Saarulliit nunatta imartaanut uteqqilersut Pinngortitaleriffimmiit oqaatigineqarpoq, aalisarneqarnissaalli innersuussutigineqanngikkallarpoq.
Saarulliit suli mikivallaarput, 2008-milu aalisarneqarsinnaalernissaat ilimagineqarpoq.
Saarulliit pineqartut ukioq 2003-meersuupput, maannalu 40-t centimeterit missaanni takissuseqarlutik.
- Saarulliit 2003-meersut 2008-mi aalisarsinnaalernissaat ilimagisinnaavarput, taamanikkussamut allinerusimassammata, Pinngortitaleriffimmeersoq Kaj Sünksen oqarpoq.
Kingullermik taama saarulleqartigimmat 1984-imeersunik saarulleqarpoq, taamanikkullu pisarineqartartut 170.000 tonsit pallillugit pisarineqarsimapput.
Kaj Sünksenilli oqaasii malissagaanni saarulliit 2003-meersut 1984-imut naleqqiullugit ikinnerulaassangatinneqarput, pisarineqarsinnaalissappata 130.000 tonsit sinnerlugit pisarineqarsinnaalissammata.
Pinngortitaleriffiup kisitsisaatai naapertorlugit katillugit 136.000 tonsit pallillugit pisarineqartarsinnaassapput.
Immap kissakkiartornera taamatut ingerlaannassappat saarulliit amerliartorsinnaapput, Kaj Sünksen oqarpoq, immallu kissarnera 1950-imili uuttortarneqartalermalli aatsaat taama kissartigilersimasoq aamma oqaatigineqarluni. Siorna uuttortaaneq tunngavigalugu Kaj Sünksen taama oqarpoq.
Tamanna pissutigalugu saarulliit ilaat sej-it kiisalu kullerit aamma pisarineqartalersimapput.
1960-ikkunni saarullinniarneq ingerlallualeruttormat 450.000 tonsit pisarineqarsimagaluarput.
