2008-mi pinerluttulerinermik suliat sammineqarnerit

Pinerluttulerinermik suliat ukiup ingerlanerani tusagassiuutitigut malinnaaffigineqarluartut ilagaat Louise Hegelundip toqutaaneranik politiit paasiniaanerat aamma qilalukkat qernertat 48-t Illoqqortoormiut eqqaanni qimaannarneqarsimasut nassaarineqarnerat.
Allattoq Louise M. Kleemann
decembarip 29-at 2008 06:47

Ilinniartumik Louise Hegelundimik toqutsisutut pasisamik eqqartuussineq Sisimiuni septembarimi naammassineqareerpoq. Unnerluunneqartoq aalajangersimasumik piffissaligaanngitsumik Herstedvesterimi pineqaatissinneqarsimasunut inissiisarfimmiittussanngorlugu eqqartuunneqarpoq.

- Kisianni suliaq taamaalilluni naammassinngilaq, tassami eqqartuussaasup suliaq Nunatta Eqqartuussivianut suliassanngortimmagu, politimester Steen Silberg Thomsen oqarpoq.

Suliaq alla nunatsinni nunanilu allani tusagassiuutitigut malinnaaffigineqarluartoq tassaavoq qilalukkanik qernertanik qimaannakkanik arlalinnik Illoqqortoormiut eqqaanni nassaarneq. Tamatumunnga atatillugu inuit aqqarneq marluk piniarnermut maleruaqqusanik unioqqutitsisimasutut maanna pasineqarput.

- Kisianni akiligassinneqassanersut imaluunniit eqqartuussivimmut sassartinneqassanersut suli aalajangerneqanngilaq, politimester Steen Silberg Thomsen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq