2008-mi Danmarkimi illut qaffassanngillat
USA-mi taarsigassarsiniartarfiit ajornartoornerisa kinguneranik danskit illuutillit ernianut aningaasartuutaasa qaffannissaraluat pinngitsoortinneqarpoq, tamannalu 2008-mi ingerlannassassoq ilimagineqartoq, Danmarkimi aviisit pingaarnerit inuussutissarsiornermik sammisaqartut nittartagaanni EPN.dk-mi allaaserinnittoqarpoq.
Danmarkimi illuutillit 2008 ernummatiginagu ukiortaarsiorsinnaanngorput, tamannalu killormoortutut isigisariaqarpoq, tassami USA-mi ernianut aningaasartuutit qaffakkiartorsimaqimmata.
”Manna tikillugu taarsigassarsiniartarfiit ajornartorsiornerat suli maluginiarsimanngilarput, illua’tungaatigulli ajunngitsortaannai kisiisa maluginiarpavut. Europamimi qitiusumik aningaaserivissuup arlaleriarluni ernianik qaffaanissaa pisariaqarsimagaluarpoq, taamaaliornissaagaluilli unitsinneqarallarsimapput, taama oqarpoq Jakob Legård Jakobsen, Nykredit-imi aningaasaqarnermut siunnersortaanerusoq.
Taamaattumik Jakob Legård Jakobsenip illuutilinnut siunnersuutigaa pappilissanit aningaasanik nalilinnit obligationinit sivikitsumik niuerutineqartartunit attartukkatik aningaasalersorsinnaassagaat, taakkumi 2008-mi allanngungaarnavianngimmata.
Aningaasaqarnermut siunnersortaanerusoq alla Nordeameersoq Anders Matzen isumaqataavoq, taannami ilaatigut ima oqarpoq.
- USA-mi taarsigassarsiniartarfiit ajornartorsiornerat Danmarkimut tuniluukkumaartoq ilimaginngilarput, illua’tungaatigummi niuernermik aalajaannerusumik kinguneqarsimavoq.
Aningaasarsiornermik ilisimasallit pappilissat aningaasanik nalillit obligationit sivisuumik niuerutigineqartartut erniaasa nikingaarnissaat aamma ilimagineqanngilaq.
USA-mi taarsigassarsiniartarfiit ajornartorsiornerannut, illuutillit taarsigassarsiaminnik akiliisinnaajunnaartut amerleriapiloornerannik aallaaveqarpoq, taamaalillutillu aningaaserivinnut taarsigassarsisitsisarfinnullu annaasaqaataasalersimallutik. Taamaakkaluartoq taarsigassarsiaminnik akiliisinnaajunnaartut taama amerlatiginissaat ilimagineqarsimanngikkaluarpoq.
Danmarkimi taarsigassarsisitsisartut manna tikillugu taamatut eqqorneqassanngillat. Kisianni imaanngilaq illunik niuerneq 2008 naallugu sunnerneqarnavianngitsoq, tassami illut sumiiffinni assigiinngitsuni akikillinissaat avaqqunneqarsinnaagunanngilaq.
Inissianik niuerneq tamakkiisoq ukiortaamiit ukiortaamut allanngungaarnavianngilaq, kisiannili akitigut ineriartorneq assigiinngiiaartorujussuussaaq. Københavnimi illut 5 procentit tikillugit akikillinissaat ilimagisariaqarpoq inissiallu 10 procent angullugu akikillinissaat ilimagineqarsinnaalluni,Anders Matzen Nordeameersoq oqarpoq.
- Københavnimi inissiat akitsorpallaarujussuarsimapput Jakob Legård Jakobsen ilaliivoq.
Taamaakkaluartorli imaanngilaq Danmarkimi taarsigassarsisitsisartut ajornartorsiornerarneqarsinnaanngitsut.
Isumaqarpunga 2008 ernumaffiusariaqanngitsoq, kisianni soorunami arlaannik pisoqarsinnaavoq. Kisianni tassa aningaasarsiornermut suliffissaqartitsiniarneq pingaarnerpaavoq, maannakkumiillu allanngungaarnavianngilaq, innuttaasut isertitaqartuartussaapput, aningaasat nalikilliartornerat mikeqaaq, taamaattumillu aningaasat pisissutigineqarsinnaanerat uninngaannapajaarluni. Tamakkiisumik isigalugu ajunngivippoq Jakob Legård Jakobsen naggasiivoq.
