2007-imi ilinnialerniarlutik qinnuteqartut 1.188-iupput
Sulisartoqarnermut Inuutissarsiutinullu Ilinniartitaanernut pisortaqarfiup 2007-imi inuussutissarsiutinik ilinnialerniarlutik qinnuteqartut pillugit misissuinera naapertorlugu, inuit 1.188-it inuussutissarsiutinik ilinnialerniarlutik qinnuteqarput.
Allattoq Elisa Isaksen
septembarip 21-at 2007 08:12
Misissuinerup ersersippaa qinnuteqartut 51 procentii arnaasut. Mississuineruttaaq ersersippaa qinnuteqartut 14 procentiinnaat nunaqarfinneersuusut.
Arnat allafissornerup iluani ilinniagaqalernissartik pilerigineruaat, tassa 237-it allaffimmiunngorniarlutik qinnuteqaramik. Pilerigineqarnerit tulleraat inulerinermik ilinniagaqarneq. Kiisalu qarasaasiaq atorlugu ilusilersuisartutut, grafikeritut, ilinnialerusullutik arnat marluinaat qinnuteqarput.
Angutit ilinnialerniarlutik qinnuteqaateqartut akornanni Saviminilerinermik Ilinniarfik pilerigineqarnersaavoq, tassa 360-it tassunga qinnuteqaramik, angutit marluinnaat peqqinnissamut tunngasunik ilinniagaqarniarlutik qinnuteqartut.
