2006-mi 2007-milu ilinniakkamik unitsitsisut amerlapput

Nunatsinneersut 30-t immikkut ittumik akuerisaallutik Københavnimi ukiuni 2006-imi 2007-imilu ilinnialerput. Ilinnialersut 30-t akornanni maanna arfineq-pingasuinnaat suli ilinniartuupput, sinneri 22-it uniinnarsimasut, taakkunaniillu 14-it allanik ilinniagaqalersimallutik.

Immikkut ittumik ilinnialernissamut akuerinnittarneq Namminersornerullutik Oqartussat Danmarkimilu Ilinniartitaanermut Ministeriap isumaqatigiissutaat, Kalaallit Nunaanneersut ilinnialernissamut piumasaqaatinik naammassinninngikkaluarlutik ilinniakkamut isersinnaalersitsisarpoq. Assersuutigalugu karakterit agguaqatigiissillugu minnerpaaffissaanik piumasaqaat ataassimagaluarunikkuluunniit kalaallit isersinnaasarput, aatsaalli agguaqatigiissillugu minnerpaamik 8-rsimagunik.

Danmarki tamakkerlugu ilinniarfinni Nunatsinneersut immikkut ittumik akuerisaallutik ilinnialersut qanoq ingerlanerat misissorneqarneq ajorpoq, taamaammat Københavnimi ilinniartuusut misissuiffigineqarnerat siullermeerutaavoq. 2006-imi 2007-imilu ilinniakkanut ingerlaqqiffiusunut immikkut akuerisaallutik isertut 30-it akornanni 22-t ilinniakkaminnik unitsitsipput. Misissuinerulli aamma takutippaa 22-it akornanni 14-it allanik ilinniagaqalersimasut.

Illoqarfiit Odense, Århus aamma Aalborg immikkut akuerisanik kalaallinik aamma ilinniartoqaalupput, taakkuli misissuiffiusimanngimmata erseqqissumik oqaatigineqarsinnaanngilaq qassit uniinnarsimanersut. Illoqarfinni taakkunani ilimagineqanngilaq ilinniakkaminnik taamaatitsiinnartartut Københavnimisulli amerlatigissasut.

Københavnimi immikkut akuerisaallutik 2008-mi ilinnialersut 13-iusut suli unittortaqanngitsut misissuinerit aamma takutippaat.