2006-imi sulitilluni ajutoornerit saqqummiunneqarput

Siorna 2006-imi sulitilluni ajutoornerit nalunaarsorneqarnerat nunatsinni Sullivinnik Nakkutiliisoqarfimmit saqqummiunneqarpoq.

Siornalu 2006 -imi sulitilluni ajutoornerit siornaak 2005-imut naleqqiullutik 19 procentimik annertunerusimapput, sulitillunilu ajutoornerit ilungersunartorujussuit 14 procentimik annertuseriarsimallutik.

Siorna ajutoornernik toqumik kinguneqartunik sisamanik nalunaaruteqartoqarsimavoq, ajutoornerillu ilungersunartorujussuartut nalunaarutigineqartut 148-simapput.

Sullivinnik Nakkutilliisoqarfiup nalunaarusiaa ukiunut qulinut kingullernut tunngavoq, tassa 1997-imiit 2006 ilanngullugu, tassanilu takuneqarsinnaavoq, sulitilluni ajutoornernik nalunaarutiginnittarnerit ukiut ingerlaneranni amerliartorsimasut.

Ajutoortoqarpat ajutoortorlu ikinnerpaamik ullormik ataatsimik sipporlugu sulisinnaanngippat tamanna, Sullivinnik Nakkutilliisoqarfimmut ajutoornertut nalunaarutigissallugu suliffeqarfiit pisussaaffigaat.

Umiartortilluni aalisartilluni timmisartortilluni aammalu ikummatissarsiornermi qilleriviup sissap avataanittumi ajutoornerit Sullivinnut Nakkutilliisoqarfimmut nalunaarutigineqartartussaanngimmata Nakkutilliisoqarfiup naatsorsuutaani ilaanngillat.