2.000.000-inik ajunngitsorsiassaqartitsineq
Kisitsisit taakku Palle Christiansenip Aningaasaqarnermut naalakkersuisumut Vittus Qujaukitsumut § 37 naapertorlugu apeqquteqaateqarneranut atatillugu paasissutissiissutigineqarput. Lynge-Pedersenilli soraarneranut suna pissutaasimanersoq pillugu paasissutissanik paasissutissaqanngilaq. Namminersorlutik Oqartussat soraartullu akornanni imaqatigiissutaasoq tamatumunnga pissutaavoq, illuatungeriimmi soraarsitsinermut pissutaasoq oqaaseqarfiginnginnissaanik isumaqatigiissuteqarsimapput.
Taamatut immikkut piumasaqaateqartarneq ombudsmandip akerleralugit oqaaseqarfigisimagaluarpai, maannamullu tamanna sunniuteqarsimanngilaq.
-Immikkut piumasaqaatit tamakku immikkut sammineqarnissaat siunertaralugu apeqquteqaateqarpunga. Pisortap soraarneranut suna pissutaanersoq ilisimaneqanngilaq. Siumup naalakkersuisuutitaasa siuliisa nalaanni atorfininnerminiilli sulilluarsimagalarpoq susassaqarfimmilu ilisimasarpassuarnik pigisaqalersimalluni. Politikkikkut tunngavilimmik soraarsitsinerunersoq, imaluunniit Lynge-Pedersenip allanik misileerusunneranik pissuteqarnersoq paaserusukkaluarpara. Kingulleq eqqumiilaarpoq, ukiunimi killilinni atorfinitsitaanissamik isumaqatigiissutini ukiunik pingasunik januaarip naanerani sivitsoqqammerpaa, Palle Christiansen nassuiaavoq.
