200-t ajunaarsimanissaat annilaanngatigineqarpoq
Timmisartorsuaq Brasiliami São Paolomi unnuaq nakkarmat inuit 200-t ajunaarsimanissaat annilaanngatigineqalerpoq.
Ajutoorneq allaqqussinnaasimanngilaq, Brasiliami mittarfiit ulapaarfiunersaanni oqartussaasut sillimaniarnermut tunngatillugu allalitsigut aaqqeeqqullugit uparuartorneqartarsimagaluarput.
Timmisartoq normoqartoq 3054 Times Press-ip timmisartuutaa. Pilersaarutit malillugit Brasiliap kujataaniit Porto Alegre-miit São Paolop mittarfianut Congonhasimut 176-inik ilaasoqarluni nakkarsimavoq. Timmisartoq minnialersilluni ajutoorsimavoq, siallerujussuarneratigut mittarfik quasattorujussuanngorsimavoq. Timmisartorlu mikkami sisoorujussuarsimavoq, aqqusineq angallaffiusoq aqqutalugisinnarlugu naggataatigut quersuaq orsussaasiviusoq aporsimavaa taamaalillunilu qaartoorujussuarnermik pilersitsisimalluni. Isiginnittut ilaat aviisimut Associated Pressimut oqaluttuarpoq, timmisartoq apormat quersuaq timmisartorlu pavugarsuaq innermik naarallaffiusumik qaarsimapput.
Takunnissimasut allat isumaqarput, ilaasunik annattoqarsimassappat tamanna tupinnartuliaassasoq.
Timmisartoq minnerliormat nunamiittut inuit toqusimasut ikilertitersimasullu tamani tamaani takussaasimapput.
Timmisartup ajutoornera pisimavoq, naak, Congonhas-ip mittarfiani oqartussat ajunaarnersuaqarsinnaaneranut tunngatillugu pissutsinik iluarseeqqullugit oqarfigineqareersimagaluartut.
Februarimi timmisartunik aqquttut arlallit naammagittaalliorsimapput, siallersillugu mittarfiup taseqqertarnerata kingunerisaanik timmisartup kingaallassarniartarnera ajornartorsiutigisarsimagamikku timmisartut siallertumi mittarfimmi pineqartumi sisuulersarmata.
Taamaanneralu pissutigalugu timmisartut inunnik angallassissutit anginerusut eqqartuussisup aaliangigaanik mittarfimmut tassunga minnissaat inerteqqutigineqarsimavoq, eqqartuussiup mittarfiup kussiorneqarsimannginnera tunngavilersuutigisimavaa, tamatumalu saniatigut mittarfiup 100 meterinik allalinnik naappallaarnera uparuartuutigisimallugu.Timmisartunik anginerusunik mittoqaqqusiunnaarnera mittarfimmi oqartussaasunit eqqartuussivimmut suliareqqitassanngortinneqarsimavoq, ullorlu taanna timmisartunik anginerusunik mittoqaqqusiunnaaraluarneq eqqartuussivimmit atorunnaarsinneqarsimavoq. Taarsiullugu mittarfik qallersorneqarsimavoq, tamannali imaralaannguaq iluaqutaalaarsimavoq. Ataasinngormat timmisartoq mikineq mikkaluarluni quaassimavoq, ivikkanullu sisoorsimalluni. Unnuarlu ajunaarnersuaq allaqqussinnaasimanngilaq, inuit 200-it sinneqartoq inuunerannik akeqartumik. Brasiliap oqaluttuarisaanerani timmisartut ajutoortarnerisa pisoq anginersaaraat.
