200 mio.kr.-nik akiitsoqarput
Meeqqanut akilersuutit, kommuninit akilerallarneqartartut, ukiumiit ukiumut qaffakkaluttuinnartarput. Maajip naanerani nunarput tamakkerlugu meeqqanut akilersuutinut akiitsut katillugit 200 mio.kr.-t tungaanut amerlassuseqarput.
Kommuninut ataasiakkaanut paasiniaanitsinni, meeqqanut akilersuutinik, kommuninut akiitsut nunatsinni katillugit 200 millioni koruunit missaanniipput.
Inuttussuseq aallaavigalugu uersakkanut meeqqanullu agguaqatigiisillugu kommunini akilersugallit Ammassalimmi innuttaasut akiitsoqarnerpaapput.
Ammassalimmi inuit 3.000-it sinneqalaarput, taakkunanngalu meeqqanut akilersuutini akiitsut 24,3 millioni koruuniupput.
Ivittuut kommuniani meeqqanut akilersuutinik akilersuisoqanngilaq, Ivittuullu kommuniani nunatsinni kommunini kisisartaalluni meeqqanut akilersuutinik akiitsoqartitsisoqanngilaq.
Nuup kommuniani meeqqanut akilersuutinut katillugit 37,9 millioni koruunit tungaannut akiitsoqartoqarpoq, Nuummili inuttussuseq aallaavigalugu, meeqqanut akilersuutinut akiitsut kommuninut allanut naleqqiullugit ikinnerupput.
Akiitsunut akiliisitsiniartarnerni periarfissaavoq, akiitsoqartup kommunerisamini isumaqatigiissuteqarnikkut akilersuisinnaanera. Inoqartarporli akilersuisinnaanngitsunik, soorlu suliffissaaleqisoqartillugu akilersuisinnaajunnaarnermi imaluunniit sulisinnaajunnaarnersiuteqaraanni. Taamaattoqartillugu kommuninit immikkut aningaasanik tapiissutigineqartarput qaammammut 735 koruunit.
Inuilli ilaat akiligassaminnik akilersuinngitsut, pinngitsaalisaallutik aningaasarsiaminnit 33 procentinik akissarsiaannit ilanngaaffigitissinnaasarput.
