20-nik ukiulik toqutsisimasutut eqqartuunneqarpoq
HTX-imi ilinniartumik 29-inik ukiulimmik Louise Hegelundimik toqutsisimanermik Sisimiut Eqqartuussivianni suliaq maanna naammassivoq.
Angut maanna 20-nik ukioqartoq unnerluussaasorlu, Louise Hegelund-imik toqutsisutut eqqartuussaavoq.
Allattoq Louise M. Kleemann
Angut aalajangersimasumik sivisussusiligaanngitsumik Herstedvesterimi pineqaatissinneqarsimasunut inissiisarfimmiittussanngorlugu eqqartuunneqarpoq.
Louise Hegelund Sisimiuni kollegiani inimini toqutaasimasoq nassarineqarpoq. Pinerluttoqarneranit qaammatit marluk qaangiuttut angutip DNA-mik ilisarnaatai pinerluffiusumiittut nassaarineqarput, aasarlu manna pasisamik tigusarinnittoqarpoq unnerluunneqartumik.
Eqqartuussaasup eqqartuussut Nunatta Eqaartuussivianut ingerlateqqippaa.