20-nik ukiulik Nuummi sapiiserpoq
Angut kilisaammi sulisoq kilisaammit Nuup umiarsualiviani talinngasumit kilisaatip talittarfiullu akornannut immamut siorna aggustip 31-ani nakkarpoq.
Angut imaanut nakkartoq Inunnguaq Mathæussenip takusimavaa. Inunnguaq Mathæussenip politiit erngerluni kalerrippai. Talittarfimmiit kilisaammut ikipallariarluni allunaasalisarluni sukarsuarmut ammut immap nalaanut periarluni imminut ulorianartorsiortilluni sapiisersimasoq, politiit oqaatigaat.
Angut immamut nakkartoq nukillaangasimavoq, annaassiniarnerullu nalaani immamut arlaleriarluni nakkaqqittarsimalluni.
Inunnguaq Mathæussenip angut taanna tigummisinnaasimavaa, politiillu takkunnissaata tungaanut paarisinnaasimallugu.
- Inuup ipilluni ajunaarnissaa, Inunnguaq Mathæussenip pinasuartumik iliuuseqarnermigut pinngitsoortippaa. Kalaallit Nunaanni politiit Inunnguaq Mathæussen taamaammat akissarsitippaat, Nuummi politiinit vicepolitiinspektør Viggo Johansen oqarpoq
Namminersorlutik Oqartussat siorna oktobarip 22-ani tillinniarfigitinnerannut atatillugu niviarsiaqqap aqqanilinnik ukiullip politiit paasiniaanerannut atatillugu kingorna iliuusai politiinit aqagu aamma nersorniarneqassapput.