20 milliuunit koruuninik nassaarniartussanngorput

Allannguutissatut siunnersuutinut amerlanernut tunngavigineqartut tassaapput, isumaqatigiinniarnernit Aningaasaqarnermut Naalakkersuisup, Maliina Abelsenip politikkikkut partiit peqatigalugit ingerlassimasai.

- Assersuutigalugu amerlasuunit isumaqatigineqarpoq nuna tamakkerlugu sanaartornermut aningaasanik amerlanernik immikkoortitsisoqartariaqarmat. Narsami uumasunut assigiinngitsunut toqoraavimmut aningaasanik immikkoortitsisoqartariaqarmat, Maliina Abelsen oqarpoq.

Aningaasanut inatsisip oqimaaqatigiinnissaa aamma pingaaruteqarpoq. Tamannali suli iluatsivinngitsoq, Maliina Abelsenip oqaatigaa.

Taamaammat pisariaqarpoq 28 millionit koruuninik nutaanik sipaarniuteqarnissanut isertitassanullu siunnersuuteqartoqarnissaa.

Tassani lottornermi akileraarutit 15 procentiniit 30 procentinut qaffanneqarnissaannik Naalakkersuisut siunnersuuteqassapput, tassanilu 8 millionit koruuninik nunatta karsianut isertitaqassallutik.

Naalakkersuisut taamaalillutik pingajussaaneerinnittoqannginnerani, katillugit 20 millionit koruuninik sipaarniuteqarnikkut, imaluunniit allanik isertitaqarnikkut, suli nassaarniartariaqarput.

Akitsuutit assigiinngitsut allat Naalakkersuisut eqqarsaatigisimavaat. Taakkununnga ilaavoq, Siumumiit tigussaasumik siunnersuut ingerlatseqatigiiffinnut aatsitassanik uuliamillu ujarlernissamut akuersissummik tunineqarsimasunut ujarlernermi aningaasartuutaasut ti procentinik akitsuusiisoqarnissaanik imaqartoq.

Sammineqartoq pillugu sukumiisumik misissuisoqareerneratigut, Inatsisartullu tamanna pillugu isumasioqatigeereernerisigut, Naalakkersuisut erseqqissumik isumaqarput taamatut akitsuussiineq ingerlatseqatigiiffiit ujarlersut Kalaallit Nunaanni ujarlernissamut aningaasalersuerusunnerannut massakkut toqqaannartumik akornutaasinnaassasoq.

Taamaattumillu Naalakkersuisut siunnersuutinik allanik ujartuipput.