Pakistanimi nunap siorna sajunneratigut inuit 2 millioningajannik amerlassusillit angerlarsimaffeeruttut, ukioq sakkortoqisoq naakkittaaqisorlu tuperni ulissianiluunniit atoqqittussanngorpaat.
Taamaattumik nunap sajunneranit eqqugaasut ikiorneqarnissamik massakkorpiaq pisariaqartitsipput, taama nalunaaruteqarpoq nunarsuaq tamakkerlugu ikiuiniaqatigiiffik Oxfam.
Kashmir siorna oktobarip arfineq-pingajuanni nunap sajunneranit eqqorneqarpoq. Nunap sajunnera Richterip nalunaarsuiffiani 7,6-iuvoq, nunalu tamanna ukiuni untritilikkuutaani aatsaat taama sakkortutigisumik nunap sajunneranit eqqorneqarpoq.
Kashmir-imi nunap sajunneratigut inuit 79.000-it angullugit amerlassuseqartut ajunaarput, meeqqallu 11.000-it angajoqqaaverullutik. Ajunaartut amerlanersaat Pakistanip ilaani Kashmir-iminngaanneersuupput. Katillugit inuit 3 millioninik amerlassusillit angerlarsimaffeerupput, nutaarsiassaqartitsivik Reuters taama allappoq.
Oxfam-imit oqaatigineqarpoq nunap sajunneratigut angerlarsimaffeeruttut 20 procentiisa kisimik angerlarsimaffitik sanaqqissinnaasimagaat.