1953-mi pisimasut pillugit naalakkersuisut iliuuseqaqqaartariaqarput

Kalaallit apereqqaarnagit qallunaat 1953-mi Danmarkip tunngaviusumik inatsisaannut ilanngutitinneqarsimanerannut tunngatillugu misissueqqusineq namminiilernissaq pillugu ataatsimiititaliap siulittaasuata tulliata Christian Mejdalip misissueqqusinnginnissamik mianersoqqusinera ippassaq tusarparput.

Misissuinissamillu piumasaqartuuvoq namminersorneq pillugu naalakkersuisoq Jørgen Wæver Johansen. Christian Mejdal pereersimasut nuanniitsut suleqatigiissitami eqqartorneqartariaqannginnerarlugit misissueqqusineq itigartippaa. Namminiilernissaq pillugu ataatsimiititaliap siulittaasua Kalistat Lund aperaarput, tamanna qanoq isumaqarfigineraa, akivoq Mejdalilu paatsooqatigiinnginnissartik pingaaruteqartoq, isumaqanngilarlu Mejdalip suna tamaat puiguinnarlugu ingerlaniartoq.

- Isumaqarpunga Mejdalip ataatsimiititaliami sulianiarnitsinni suliakkiutaanngitsut kalluarnaveersarai, aamma paasinarpoq. Soorunami pereersimasut puiguinnarneqarsinnaanngillat, Kalistat Lund oqarpoq. Aamma oqarpoq naalakkersuisut suliakkiutaat malillugu ataatsimiititaliami suliarineq ingerlanneqartoq, taakkuusuppullu sulisitsisut.

Kalistat Lund oqarpoq.

Aamma oqarpoq eqqartorneqartoq imaannaanngeqimmat naalakkersuisut suliassap qanoq iliuuseqarfiginiarnissaanut iliuuseqartussaasuusut. Ammaffiginerarpaalu tamatumunnga tunngasumik suliakkiummik takkuttoqassangaluarpat. Erseqqissaatigaalu kalaallit nunaat kisimi pineqanngimmat Savalimmiulli aamma pineqarmata. Kalistat Lund isumaqarpoq suliassaq imaannaanngereeqisoq nunatsinni naalakkersuisut qallunaallu naalakkersuisuisa akunnerminni suliassaq tigusariaqaraat, qanorlu ingerlariaqqinnissamik ujartuisariaqartut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat