1949-mi kingullermik prinsessemik inunngortoqarpoq

Dronning Margrethep nukaa Prinsesse Ane Marie 1949-mi inunngormalli Prinsesse-aqqamik Danmarkimi kingullermik inunngortoqarpoq. Ullumilu aatsaat kingumut Mary kunngissarlu panissaarmata prinsesse-aqqamik Danmarkimi inunngortoqaqqippoq.

Prinsesse-araq 50 centimeterisut angitigisoq 3350 gramminillu oqimaassusilik Danmarkip nalunaaqutaa naapertorlugu sisamanut Rigshospitalimi inunngorpoq. Akunnialuit qaangiuttullu kunngissaq anillappoq panissaavarartillu oqaluttuaralugu:

- Kingullermitulli misigisaq nuannertigalunilu tupinnaqaaq. Tamatumuuna ataatanngulerninni piareersimaneruvunga, kunngissaq tusagassiortorpassuarnut oqarpoq.

Tusagassiortut ilaata apererpallappaa, ernisuttumut ilaanermini iluaallingajassimannginnersoq.

- Naamik iluaallingajanngilanga, kusanarluinnartumilli ernisuppoq.

Tusagassiortullu ilaata aamma apererpallappaa panissaavata isai qanoq qalipaateqarnersut.

- Suli nalunarpoq, aallaqqaammut isai taaramik, nujakkaarujussuuvoq nujai aamma taartuupput, kunngissaq tulluusimaaqisoq oqarpoq.

Kinguninngua aanaakkut aataalu tassa Dronning Margrethe Prins Henrillu inoorlaap aneeraa Prins Christian ilagalugu Prinsesseaqqamut takusaallutik takkupput.

Nunatsinniittaaq Inatsisartut sinnerlugit Inatsisartut siulittaasuat Jonathan Motzfeldt kunngissakkunnut pilluaqqussummik nassitsivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat