1930-kkunni assiliissuserluni timmisartumik ilisimasassarsiorneq nanginneqartoq
Karsi Kalaallit Nunaata sermersuanik assilisatoqqanik imalik nassaarineqarmat, Københavns Universitetimi ilisimatuut isumassarsisimapput. Sermit iigartartut 1932-mi 33-milu assilineqarsimasut, sermip milliartorneranut takussutissarsiniarlutik, assileqqinniarlugit aalajangersimapput.
Inuussutissarsiutigalugu assiliisartoq Hans Henrik Tholstrup assiliisorineqarpoq, taassumalu Nunarput asannilersoorfigisimavaa.
- Aatsaat Kalaallit Nunaanniippunga, tikinnissaalu takorloorsimanngikkaluarpara. Alutornangaarmalli ingerlaannaq tiguartissutigaara, oqarpoq.
Sermit iigartartut imaanut ungasissumiittut qanittumiittullu piffissap ingerlanerani qanoq pisimaneri assilisat atorlugit ilisimatuut paasiniarsinnaavaat.
- Sammivissat qutsissusissallu eqqortut malippaat, taamaammat assit quleriissinnerisigut ukiuni kingullerni 80-ini qanoq pisoqarsimanersoq takuneqarsinnaavoq. Paasisavullu soqutiginaqaat. Sermimmi ilaat kilometererpassuarnik millisimapput, Hans Henrik Tholstrup oqarpoq.
Tunumik piginnittuuneq pillugu Norgemut saqitsaassutigineqarnermut atatillugu 30-kkunni assilisatoqqat assilisaapput. Taamanili Københavns Vestvoldimi bunkerimiipput, sorsunnerup nalaani toqqorneqarfiini.
Assiliisartut timmisartortartullu taamani sulinerminni atugaat allaanerupput. Politiken naapertorlugu timmisartup aquttarfiata ilua ilaanni 40 gradet qaangerlugit issittarsimavoq.
- Sakkortusimassaaq, timmisartup ilua matusartoqanngimmat. Uagut kiassaat ikiinnarsinnaallugulu igalaat matuinnarsinnaavagut, taamaammat ajornartorsiuteqanngilagut. Taamanili sakkortusimassaqaaq, oqarpoq.
Ilisimatuut aallannginnerminni GPS atorlugu koordinatinik naatsorsuereersimapput. Taamaasillutik siulimik nalunaaquttap akunneri tuusinterpassuit atorlugit assilisaat ilaarlugit ulluni pingasuni assiliisaqattaarlutik angalasinnaasimapput.
Assit atuakkiaralugit novembarimi saqqummersinneqassapput, tunisaaneranilu sinneqartoorutaasut Kalaallit Nunaanni meeqqat angerlarsimaffiinut tunniunneqassapput.
