1800-t ajunaarsimanissaat ilimagineqarpoq
Filippinerini nunaqarfeeqqat ilaanni Guinsaugon-imi, sapaatit-akunneri arlallit sialussuaaqattaarnerata kingunerisaanik nuna sisoormat, nunaqarfimmi innuttaasut 1800-t missaanniittut matoorussaasimasut suli nanineqanngillat. Annaassiniarnerit ingerlanneqareersullu maannamut inuit 57-iinnaat annaanneqareerput, annilaanngatigineqarporlu inuit 1800-t missaanniittut ajunaarsimanissaat.
Inuit toqungasut timaat 41-ut nanineqareerput, ilimagineqarporlu toqungasut amerlaneroqisut maqullummit matoorussaasimasut qaqinneqarnissaat.
Nunatta nalunaaqutaa malillugu sisamanngormat unnukkut nalunaaqutaq qulinut nunaqarfimmi Guinsaugon-imi Filipiineriniittumi nuna sisoorpoq, illullu amerlanersaat maqullummik 10 miiterisut portutigisumik matoorneqarsimapput. Annattoqaqqissinnanissaa maannakkut ilimagineeruttoq, qeqertami Leyte-mi, nunaqarfiup Guinsaugon-ip guvernøria Rosette Lerias BBC-mut oqarpoq.
Nunat assigiinngitsut maannakkut aningaasanik nassiussuilerput, ilaatigut Danmark 700.000 koruuninik, Australialu 4,6 million koruuninik ajunaarnersuarmi ikiuutissanik tunisivoq.
