Angut 18-nik ukiulik Nuummeersoq tillinniartarsimasutut angallannermullu inatsimmik unioqqutitsisimasutut ulluni 14-ni tigummigallagassanngortinneqarpoq.
Angut 27-eriarluni unioqqutitsisimasoq politiinit uppernarsarneqarsinnaasimavoq.
Nuummi Brugsenimi sapaatip akunnerani kingullermi tillinniarsimasutut ilaatigut unnerluutigineqarpoq.
Tillinniat Brugsenimut unnuakkut isersimapput, isiginnaarutit nutaaliat saattunnguit arfinillit, pc-t angallattakkat marluk taavalu DVD immiussissut ataaseq. Tillitat 58.000 koruuninik naleqarsimapput.
Isiginnaarutit tillinneqartut tamaasa politiit nassaarereerpaat, pc-lli suli nassaarineqanngillat.
18-nik ukiulik biilinik aamma tillinniartarsimavoq ingerlatsinermullu allagartaqallannguarnani biileqattaartarsimalluni.