18-inik ukiulik VM-imi assammik arsallammak

Kalaallit angutit assammik arsartartut Tysklandimi ingerlanneqartuni VM-imi ualiartoq unamminerminni Sloveniamiunut ajorsarput. Sloveniamiut 35-21-imik ajugaapput. Nikinnermi 17-9-qqasimallutik.

Kalaallit Sloveniamiullu unamminerat naammassimmat Nunat tamalaat assammik arsartartut kattuffissuannit kalaaleq 18-iinnarnik ukiulik Angutimmarik Kreutzmann, qulinik isertitsinermigut isaatitsinerpaasoq, arsallammattut toqqarpaat, Angutimmarik Kreutzmann tupinnanngitsumik nuannaarnerup pianik qullilisoq ualiartoq toqqaannartumik KNR TV-kkut aallakaatinneqartumi takuneqarsinnaavoq. Angutit assammik arsartartut nuna tamakkerlugu sungiusaasuat Jakob Andreasen angusartik assut kusanarnerarpaa, pingaartumik eqqarsaatigigaanni Sloveniamiut assammik arsallammassuartut isigineqarnerat.

Sloveniamiut sungiusaasuata kalaallit aamma ilimagisamit sakkortunaarsimallugit tusagassiortunik katersortitsinermi oqaatigaa.

- Unamminermi 5.000-t isiginnaartuupput, unamminerullu minutsiini kingullerni isiginnaartut nikuerrallutik kalaallit ersaattaassuataarpaat, migisisaq imaannaasimanngilaq, sungiusaasuat oqarpoq.

Kalaallit aqagu sapaammi nalunaaqutaq ulloqeqqanut unammilerunik Tunesiamut unammissapput, unamminerlu KNR radiokkut TV-kkullu malinnaavigineqarsinnaajumaarpoq.