Nunatta eqqartuussivia piumasaqaatitaqanngitsumik ukiumi ataatsimi pineqaatissinneqarsimasunut inissiinisarfimmiittussanngortitsilluni sukannernerulersititsilluni ippassaq eqqartuussivoq.

17-nik ukiulik toqumik kinguneqartumik aallaannittoq sukannernerusumik pillarneqarpoq

Inuusuttuaqqat Qaqortumi eqqaavissuarmi aallaammik imalimmik aallaanerata kingorna nukappiaraq 14-inik ukiulik siorna toquvoq.

Nukappiaqqap maanna 17-nik ukioqartup toqumik kinguneqartumik aallaasimanera pillugu eqqartuunneqarnera nunatta eqqartuussivianit sukannernerulersinneqarpoq.

Nukappiaqqat pingasut Qaqortumi eqqaavissuup eqqaani siorna juulip pingajuata sisamaatalu akornanni unnuakkut kangermiipput.

Taakku taamani 13-inik, 14-inik 16-inillu ukioqartut aalakoorsimapput, tulleriaallutillu aallaammik aallaasaqattaarsimallutik.

16-inik ukiullip 14-inik ukiulik qanimut ullaassanngoriartulersoq eqqorsimavaa, 14-inilliu ukiulik toqussutigisaminik timimi iluatigut ikiligaarujussuarpoq. 

Suliaq Eqqartuussisoqarfik Kujallermi suliarineqarmat nukappiaraq 16-inik ukiulik inunnik isumaginnittoqarfimmit ukiuni marlunni nakkutineqartartussanngortinneqarpoq.

Suliereqqitassanngortinneqartoq

Unnerluussisussaatitaasut suliamik nunatta eqqartuussivianut suliareqqitassanngortitsipput, eqqartuussullu piumasaqaatitaqanngitsumik pineqaatissinneqarsimasunut ukiumi ataatsimi inissiinissamik ippassaq sukannernerulersinneqarpoq.

Kalaallit Nunaata Politiivini unnerluussisussaatitaasut taama paasissutissiipput. 

Unnerluusisussaatitaasup suliamik ingerlatsisup Alexander Stürupip eqqartuussineq iluarisimaarpaa. 

- Suliami taama ilungersunartigisumi alianaqisumillu meeqqap toquneranik kinguneqartumi nunatta eqqartuussiviata unnerluussisussaatitaasut politiillu isumaqatigalugit piumasaqaatitaqanngitsumik pineqaatissinneqarsimasunut inissiinissamik eqqartuussinera iluarisimaarpara. Pinerluttoq inuusukkaluarpalluunniit, tusagassiutinut nalunaarummi allappoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl