17-inik ukiulik niaqqumigut aallaaneqartoq siumukartuarsinnarpoq

- Suli pisussinnaanngilaq, taamaammallu issiviammik kaassuartakkamik ingerlasariaqarluni. Allullattaasinnaavorli, nakorsallu pisussinnaaleqqissasoq oqaatigaat. Timaa peqqissiartorpoq, 17-inik ukiulimmut anaanaasoq, Benedikte Nielsen, Ekstra Bladetimut oqaluttuarpoq.

Inunnguaq Nielsenip Esbjergimi Gl. Vardevejimi siornatigut toqutsisimasutut eqqartuussaasimasumit aallaaneqarnermi kingorna aqerloq suli qarasarmioraa.

- Inunnguup pissusaa qujanartumik allanngorsimanngilaq. Pissusaa suli taannaavoq, maannalu atuarsinnaavoq, allassinnaalluni oqalussinnaallunilu. Nakorsat oqaatigaat aqerloq qarasaaniittoq ilorpasippallaartoq taamaattumillu peerneqarsinnaanngitsoq. Taamaammat suli niaqorluttarpoq, allatigulli anniaateqarani, Benedikte Nielsen Ekstra Bladetimut oqaluttuarpoq.

Syd og Sønderjyllands Politiivini vicepolitiinspektøri, Bent Thuesen, Ekstra Bladetimut oqarpoq, suliap politiinit paasiniaaffigineqarnera naammassereersoq.

- Suliaq matusussanngorparput. Tigusarineqartoq toqutseriarsimasutut suli unnerluutigineqarpoq. Suliaq unnerluussisussaatitaasunut ingerlateqqissavarput, suliallu qanoq ingerlateqqeriarnissaa tassanngaanniit aalajangiiffigineqassalluni, Bent Thuesen oqarpoq.

Aallaannittoq tigusaanermi kingornali parnaarussivimmi paarineqalerpoq. Seqqorsimanini nassuerutigisimavaa, knallertili eqqorniarsimagaluarlugu oqaatigalugu.