17. april ulloq kalaallinut pingaartoq
Tamatuma kingorna Isumalioqatigiisitap isumaliutissiissutaa Namminersornerlu pillugu inatsisissatut siunnersuut ministeriunermut Naalakkersuisullu siulittaasuanut tunniunneqassapput.
Taama oqarpoq Siumumeersoq Lars-Emil Johansen, innuttaasut naalagaaffiullu pisussaaffii pillugit Isumalioqatigiissitap suleqatigiisitaliaani ilaasortaasoq. Taassuma suliap inernera iluarisimaarpaa taallugu namminersulivinnissamut alloriarnerusoq angisuumik pingaarutilik.
-Kalaalit Nunaata namminersulivinnissaata ineriartorteqqinnissaanut Kalaallit Nunaatalu tunngaviusumik inatsisitaassaata piareersarnissaanut piareerpugut, Lars-Emil Johansen oqarpoq. Innuttaasut naalagaaffiullu pisussaaffii pillugit suleqatigiissitap suliani isumaqatigiilluni ippassaq inaarpaa, taamaallaat Dansk Folkeparti pinnani, taakku suleqatigiisitami sinniisuutitaqanngimmata.
Lars-Emil Johansenip Namminersorneq pillugu inatsisissaq sunik imaqarnersoq qulaarpaa. Tallimanik immikkoortortaqarpoq pingaarutilinnik ukuusunik:
Nunarsuami inuiaat pisussaaffiinut tunngatillugu kalaallit inuiattut namminiusutut nalunaarutigineqarput.
Uppernarsarneqarpoq Kalaallit Nunaat nunap pisuussutaanut uumaatsunut uumassusilinnullu piginnittuusoq.
Uppernarsarneqarpoq aatsitassanik isertitat 75 millioni koruunit angullugit Kalaallit Nunaata namminersortup pisassagai kiisalu millionit tullii Kalaallit Nunaata Danmarkillu avittassagaat.
Uppernarsarneqarpoq aatsitassarsiornikkut isertinneqartartut amerliartornerat peqatigalugu naalagaaffiup tapiissutigisartagai ikiliartortinneqassasut.
Naggataatigullu uppernarsarneqarpoq, Kalaallit Nunaat siunissami namminersulivissappat tamanna kalaallit inuiaat namminneq aalajangissagaat inuiaqatigiinnik taasititsinikkut.
