16-inik ukiullit qinersisinnaataassanngillat

Inuit Ataqatigiinneersup Georg Olsen-ip inuusuttut 16-inik ukioqalereersimasut qinigassanngortillutillu taasisinnaalequllugit qinersisarnermut inatsisip allanngortinneqarnissaa ippassaq inatsisartuni siunnersuuteqarpoq, partiinilli tamanit ilalernartinneqanngilaq.

Kiiu Olsen-ip qinersisinnaatitaanerup taasisinnaatitaanerullu 18-iniit 16-inut appartinneqarnissaanut siunnersuuteqarnermini kissaatigaa, inuusuttut inuiaqatigiillu silinnerusumik amerlanerussuteqarluartumillu taaseqataasalernissaat.

Siunnersuut partiinit tamanit ilalernartinneqanngilaq, Kiiu Olsen-illu tusaatissatut tamanna tiguaa. Qularutiginngilaali siunissamut tamanna inuit amerlanerusut oqallinnermut peqataanerulernissaannut aammaassinerussasoq, minnerunngitsumillu partiit isumaliortaatsimut tassunga aamma siunissami oqallittalernissamut anngukkiartuaarnissaannut aallarniutaajumaartoq.

Naalakkersuisut naleqquttuusorinngilaat inatsimmik allannguisoqarnissaa. Isummersornerminnut aallavigivaat pisinnaatitaaffiit assigiinngitsut Danmarkip naalagaaffiani nunatsinnilu amerlanerpaat 18-inut ukiulinnut killeqartinneqarmata, Hans Enoksen-illi siunnersuut tunngaviatigut iluarisimaarpaa:

- Inuusuttut peqataanerulernissaanik oqariartuuteqarnera tunngaviatigut iluarisimaarnarpoq, neriuppungalu qinersisinnaatitaaneq kisiat pinnagu, inuiaqatigiit iluanni sutigut tamatigut peqataanerulernissaannut kajumissaarutaassasoq, Hans Enoksen oqarpoq.

Atassutikkunnit siunnersuutip itigartitsissutigineqarnera arlalinnit tunngaveqarpoq, isumaqarpulli isiginiarneqartariaqartoq inuusuttut ullumikkkut sutigut killilersorneqarnersut, soorlu partiit tamarmik isumaqatigiillutik inatsisit sukateqqammeraat, inuusuttut 18-it inorlugit ukiullit imigassarsisinnaanatillu tupasisinnaannginnissaannik imalik. Demokraatit siunnersuummut itigartitsipput, ullumikkut inatsisit iluarigamikkit.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat