16-inik ukiulik innarluuteqalersimasoq napparsimmavimmiitinneqaannarpoq

Nuummi angut inuusuttunnguaq 16-inik ukiulik siorna aggustimi qaratsamigut annertuumik innarluuteqalersimasoq, Dronning Ingridip Napparsimmavissuani uninngaannartariaqarpoq, Danmarkimi qaratsakkut innarluuteqartunut napparsimavimmi sungiusartinneqarnissaanut, Nuup kommuneata, Ilaqutariinnermut Pisortaqarfimmut qinnuteqarsimagaluarnera akuerineqarsimanngimmat. Nuup kommuneata innarluutilinnut sullissiveqarfiani pisortaq Pauline Abelsen, 16-inik ukiullip inissisimanera pillugu oqaluttuarnissamut angajoqqaavinit akuerineqarsimasoq, ima oqaluttuarpoq:

-Imaappoq napparsimaavimmi suliareqqinneqarsinnaanngitsutut nalilermassuk, Ilaqutariinnermut Pisortaqarfimmut qinnuteqaassimavarput Danmarkimi, taamatut sullissinermik ilisimasalinnut Århusip eqqaaniittumiittunut ingerlateqqerusullugu. Tassani annertunerusumik sullinneqarnissaa anguniarlugu.

Pauline Abelsen oqaluttuarpoq 16-inik ukiulik SANA-mut uneqqaarnermat immikkut ittumik qaammatini pingasuni sullissisussamik Danmarkimit SANA tikisitsisimasoq, taamaakkaluartorlu 16-inik ukiullip timaa ajunngitsumik qerattariartorsimanngilaq, tassa nalileeriaaseq naapertorlugu 90/100-mut killissimalluni, qerattariartorneq pitsaalluinnaraangami 100/100-tut nalilerneqartarpoq. Sullissisoq aallarmat, 16-inillu ukiulik taamatut sullinneqarunnaarami, timaata qeratassusia appariartulersimavoq, pisinnaassusialu ukioq manna februaarimi 20 procentiinnanngorsimalluni.

- Danmarkimi sungiusaasarfik attaviginikuugatsigu inuttaata allattorsimaffia tunniussimavarput, taakkulu sullissisinnaallutik naliliisimapput, uagullu upperigatsigik qinnuteqarsimavugut. Kisiannili tassa Ilaqutariinnermut Pisortaqarfimmit ajoraluartumik itigartinneqarsimalluta. suneqarsinnaanngitsutut nalilerneqareermat Nuummi utoqqarnik paaqqinnittarfimmut Ippiarsummut inissiinnaqqullugu allaffigineqarpugut. Tamannalu assut uagut akueriuminaatsissimasorujussuuarput, pineqartoq inuusuppallaaqimmat, taavalu tusaallunilu oqarneq saperaluarluni suna tamaat aamma tusaammagu.

Nuup kommunea pillorissaasuni suleqatigalugit nalilersuisimavoq, 16-inillu ukiulik immikkut ilisimasalinnit sullinneqaruni iluamik ineriartorsinnaalluartoq tassani nalilerneqarpoq.

16-inik ukiullip ajoqusernermi kingorna immikkut ilisimasalimmit tikisitaasumillu sungiusarnerneqarnermini pisinnaasarilersimasani annaassavai sungiusarneqartuanngikkuni, Pauline Abelsen oqarpoq:

-Paasereerparpummi aalasinnaanera februaarimi 20 procentiinnanngorsimasoq. Timaa qerattassaaq qaratsamigullu ineriartortinneqarnera univissaaq.

Angutip 16-inik ukiullip Danmarkimi qaratsakkut innarluuteqalersimasut napparsimmavianni Hammelimi sungiusarneqarnissaanut qinnuteqarneq siulleq itigartinneqarmat, Nuup kommunea inunnik isumaginninnermi sullissinermut tunngasut pillugit naammagittaalliuteqartarfimmut naammagittaalliuteqarsimavoq, naammagittaalliutillu suliarineqarnerata nalaani nutaamik qinnuteqaqqissimalluni, tassani angutip 16-inik ukiullip nunatta avataanut inissinneqarnissaa qinnutigineqarsimalluni.

16-inik ukiullip Danmarkimi qaratsamikkut innarluutilinnut sungiusaasarfimmiinnissaa ullormut 2.814 koruuneqassasoq Nuup kommuneata paasiniaanermini paasisimavaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat