16-eriaammik atornerluineruneq
Kalaallit Nunaanni meeqqat kinguaassiutikkut 2003-mi atornerlugaasimasut politiinullu nalunaarutigineqarsimasut katillugit 118-iusimapput, taamaasilluni Kalaallit Nunaanni kinguaassiutikut atornerluisarneq Danmarkimut naleqqiullugu 16-eriaammik annertuneruvoq. Taamak allaaserinnippoq Danskit aviisiat Kristeligt Dagblad.
Upernaviup kommuneani immikkut sammineqarsimavoq meeqqanik atornerluisarneq, tamannalu suliassarpassuarnik saqqummersitsisimasoq,
Upernaviup kommuneani inunnik isumaginninnermut pisortaq Darius Sobczynski oqarpoq.
2003-mi Inunnik isumaginnittoqarfik nunaqarfinnut angalanerminni paasisitsiniaanerit oqaloqatiginninnerillu ingerlanneqarsimapput, taamaaliortoqarneratalu kinguneraa, meeqqanik atornerluisartup ataatsip, meeqqanik arfineq pingasunik atornerluisimaneranik paasisaqarneq.
Upernaviup kommuneani inunnik isumaginninnermut pisortaq Darius Sobczynski Kristeligt dagblad-mut oqarpoq meqqaat atornerlugaasimasinnaasut amerlanerusinnaaneri ilimanartoq.
Aalborgip napparsimaviani tarnit pissusiinik ilisimasalik Bjarne B Nielsen, Kalaallit Nunaanni meeqqanik kinguaassiutikkut atornerluisarneq pillugu ukiut qulit matuma siorna misissuisimasoq oqarpoq, Kalaallit Nunaanni kinguaassiutikkut atornerluisarneq eqqartussallugu paquminartutut isiginiarneqartartoq. Misissuisimanerminilu paasisimavaa, arnat 18-it 24-illu akornanni ukiullit, tamatigut arfineq pingajuat meeraanermini kinguaassiutikkut atornerlugaasarsimasoq.
