15-nik ukiulik inissiamik aserorterisoq
- Angut inuusuttoq illup iluani tillitaqarsimanngilaq, aserorterinerulli nalaani imigassartorsimanissaa pasitsaapparput, Thomas Egedal Qeqertarsuarmi politeeq KNR.gl-imut oqarpoq.
Qeqertarsuarmi politiit naapertorlugit angutip inuusuttup, atisat akisuut arlallit sissorlugit aserortersimavai, maannamulli oqaatigineqarsinnaanngikkallarpoq aserorterneqartut katillugit qanoq naleqarsimassanersut. Taamaattumillu Thomas Egedalip oqaatigisinnaangilaa, angutip aserortikkani qanoq annertutigisut nalinginut taarsiisussanngortinneqarumaarnersoq.
Pinerluttulerinermut inatsit atorlugu malersorneqarsinnaanngoreernikuummat inuusuttoq 15-nik ukiulik unnerluutigineqassaaq taarsisussanngortinneqarumaarluni.
Maannamut politiit oqaatigisinnaanngilaat aserorterineq qangarpiaq pisimanersoq, politiilli ilimagaat oktobarip tallimaata arfineq pingajuatalu akornanni pisimassasoq. Nalorninermut pissutaavoq, aserorterisoqarsimaneranik nalunaarutiginninneq ataasinngornermi aatsaat pisimammat, inissiamullu attartortuusoq aserorteriffigineqarnerata nalaani ilinniarnini pissutigalugu illoqarfimmi allamiissimammat.
