1,5 mio.kr.-it katersorneqareerput

Nunatsinni Røde Korsip Asiami ajunaarnersuarmik eqqorneqartunut aningaasaliissutissanik katersuiniarnermini 1,5 million koruunit angugai, Kalaallit Røde Korsiata siulittaasua Aase Nygaard ilisimatitsivoq.

Aningaasarpassuit ullualunnguit ingerlanerinnaanni katersorneqarsimanerat Aase Nygaardip nuannaarutiginerarpaa. Naalakkersuisut 1,1 million koruuninik aningaasaliipput. 400.000 koruunillu sinneruttut, sinerissami suliffeqarfinnit, namminersortunit kommuneqarfinnillu aningaasaliissutaapput.

Kingullertigullu Ilulissat kommuneat ikiuiniarnermut atugassanik 40.000 koruuninik tunissuteqarpoq.

Qaammatillu matuma naalernerani Ilulissat kulturimut illorsuani aamma katersuiniarluni aaqqissuussisoqassasoq, kommune nalunaarpoq.

Telemik atuisut ajunaarnermik eqqugaasunut ikiuerusuttut aningaasaleeqataanissamut aamma ullumi periarfissinneqarput, SMS oqarasuaallu aqqutigalugit. Tassa oqarasuaatikkut normu 166-mut imaluunniit 169-imut sianertut 50 kronemik imaluunniit 100 kronemik akiligassinneqassapput. Sianernermilu isertitat Kalaallit Røde Korsiannut ingerlaannartumik tunniunneqassapput.

Aammali SMS-kkut normu 1920-mut sianertoqarsinnaavoq allallugulu ”ASIEN”, taamaalioruttalu 30 kronenik akiligassinneqassaagut.