1,5 million koruunit taasisitsinissamut atorneqassapput

Qaasuitsup Kommuniata angissusaa pillugu taasisitsinissaq sioqqullugu paasisitsiniaanissap piareersarneqarnera naammassingajalerpoq.

- Tassa aningaasaqarnermut ataatsimiisitaliamut akuereqqillugit qinnutigaagut 1,5 millioniugallartut ujassagai missingersuutit iluanni. Taamaalilluni angalanerit naammassineqarniassammata, Enok Sandgreen, Qaasuitsup Kommuniani kikkut tamat oqartussaaqataanerat, kommune, attaveqatigiinneq attaveqaatinullu ataatsimiisitaliami siulittaasoq taama oqarpoq.

Kommunalbestyrelsi maanna kisimi aalajangertussanngorpoq ataatsimiisitaliap paasisiniatsiaanissamut taasititsinissamullu periusissatut innersuussutai malissanerlugit.

Taamaattumik kommunalbestyrelsi immikkut ittumik oqarasuaatikkut ataasinngorpat ataatsimiissaaq. Ataatsimiinnermini ilaatigut aalajangiivigissavaa ataatsimiisitaliap paasisitsiniaanerit ullormi ataatsimi illoqarfinni tamani ataatsikkut ingerlanneqarnissaanut innersuussutaanut akuersiniarnerluni:

- Ulloq taannarpiaq illoqarfiit paasisitsiniaaffigineqassapput ullormi ataatsimi. Tassani illoqarfinni paasisitsiniaasut periarfissinneqassapput

Illoqarfiit nunaqarfittai tikinneqarsinnaasut tamaasa ornissagaat aamma. Tassa ulloq ataasiinnaanngitsoq suliassaqarput nunaqarfiit tikinniarnissaannut, Enok Sandgreen oqarpoq.

Ataatsimiisitaliap paasisitsiniaanissami politikerit illuinnaasiorlutik paasisitsiniaannginnissaat aamma pinngitsoorterusullugu kommunalbestyrelsimut innersuussivoq:

- Assersuutigilaarlara Qaanaaq. Qaanaami inissisimasut tassaapput Siumuminngaanneersoq Atassumminngaanneersorlu. Taakkulu tassa avitsiniarnermik kissaateqartut. Taava taakkua illuinnaasiunnginnissaat anguniarlugu kommuunip taamaanginnarnissaanik kissaateqartuninngaanniit ilalerneqassapput. Tassa orninneqassapput, Enok Sandgreen oqarpoq.

Innuttaasunik taasisitsineq marsip 25-ani ingerlanneqassaaq. Taasisitsinerlu Inatsisartunut aamma kommuninut qinersisarnertut ingerlanneqassalluni:

- Taava massakkut una suliassarput, soorunalimi inuit nuannariinnarlugit aperinavianngilagut aamma nuannariinnarlugu aningaasanik atuiffiginavianngilarput, una kommuunit angissussaasa nalilersorneqarneranut atatillugu Qaasuitsup Kommunia aamma aperineqanngitsoorunnanngilaq kommuunip aaqqissuussaanera innuttaasut qanoq isigivaat. Tassa una naatsorsuutigaa inerneq qanoq sunaangaluartoq, Naalakkersuisunut, Inatsisartunut kommunalbestyrelsip ingerlatissagaa, Qaasuitsup Kommuniani borgmesteri, Ole Dorph, taama oqarpoq.

Innuttaasunik taasisitsineq illoqarfinni nunaqarfinnilu tamani ullaakkut qulingiluaniit unnukkut arfineq pingasup tungaanut ingerlanneqassaaq.