15 Million koruuninik taarsiivigineqalersut
Nunavimmi qimmit inunnit naggueqatigiinnit pigineqartut politiinit 1950-kkunni 1960-kkunnilu toqararneqarput. Allatut oqaatigalugu siumut nalunaaruteqartoqaqqaarnani qimmit aallaasinik toqorarneqarput.
Politiinit oqaatigineqarsimavoq qimmit meeqqanik marlunnik saassussisimanertik pissutigalugu sillimaniarnissaq eqqarsaatigalugu uloriarnartorsiortitsisimasut. Ilaqutariit ataatsit quliniit 15-inut amerlassusilinnik qimmeqarsimapput taamaattumillu qimmit uani eqqartorneqartut 300-it sinneqarsimapput.
Taamaliortoqarnerata kinguneraa ilaqutariiaat kaannermik nalaanneqarnerat, tassami piniariarsinnaajunnaarnertik pissutigalugu ajornartorsiuleramik. Lucr Grey, Makivik sinnerlugu suliamik ingerlatsisuusoq Radioaviisimut oqarpoq:
- Ilumoorpoq qimmit meeqqanik marlunnik saassussisimammata soorunami tamanna pitsaasuunngilaq, kisiannili eqqarsaatigineqartariaqarpoq naggueqatigiit inuit kaannermik nalaanneqarmata allaallumi toqusoqarsimalluni tamatumalu kingorna ajutoorneerpassuit ajunaarnerillu pisimapput, snescooterit atugaalernerannik pissuteqartumik. Qiiminimmi atuineq pitsanerujussuugaluarpoq, Lucy Grey oqarpoq.
Qimmit pillugit suliassaq ukiorpassuarni unginngatinneqarsimavoq, sapaatilli akunnerani kingullermi, nunap immikoortortaani Quebec-mi naalakkersuisut siulittaasuat, Jean Charest qimmit toqorarneqarnerat pillugu utoqqatserpoq ilutigitillugulu suliniaqatigiiffimmut Makivimmut, Nunavimmik sullissisuusumut 15 millioner koruuninik taarsiissuteqarluni.
Lucy Grey-p Radioaviisimut ilanngullugu oqaluttuaraa, aningaasat qimmit piginnittuinut tunniunneqarnavianngitsut tassami piginnittut amerlanerpaat toqoreernikuummata, akerlianilli Nunavimmi naggueqatigiit inuit oqaasiisa kulturiatalu pigiinnarneqarnissaat pillugit suliniutinut atorneqassasut.
