15-inik ukiulik sianissutsimigut misissorneqartussanngorunarpoq

Nukappiaraq 15-inik ukiulik – arnamik 85-inik ukiulimmik, Aalborgimi najugalimmik, toqutsisimasutut pinngitsaaliillunilu arnerisimasutut - Qaqortup Eqqartuussiviani ippassaq killisiorneqartoq, sianissutsimigut misissorneqartussanngorunarpoq. Nukappiaraq toqutsisuulluni nassuereeraluartoq, inuup sananeqaataanut ilisarnaatitut takussutissaq, DNA, atorlugu politiit paasiniaasartui misissuerusupput.
septembarip 14-at 2007 10:31

15-inik ukiulik paarinerlugaasimanini pissutigalugu angerlarsimaffimmut inissinneqarsimavoq, nakuuserniartartutulli ilisimaneqanngilaq, aviisimi, Nordjyske Mediami taama allaaserinnittoqarpoq.

Nukappiaraq Qaqortumi politiinit marlunnit Jyllandillu Avannaani unnerluussisumit Qaqortumi ippassaq tigusarineqarpoq, inatsillu tunngaviusoq naapertorlugu killisiorneqarami pinngitsaaliilluni arnerisimanini toqutsisuuninilu nassuerutigai.

Nukappiaqqap Aalborgimut timmisartuunneqarnissaata tungaanut Jyllandip Avannaani Politiit Qaqortumi najorallassavaat.

Inatsit tunngaviusoq naapertorlugu Aalborgimi aamma killisiorneqassaaq. Taama pisoqareerpat tarnimikkut nappaatillit pinerluuteqarsimasut immikkoortortaqarfiannut unitsinneqassanersoq eqqartuussisumit aalajangerneqassaaq, nukappiaraq misissorneqarnermi nalaani Aalborgimi inuusuttut angerlarsimaffianni matoqqasumiitinneqassaaq.

Ippassaq tigusarineqaqqammiinnartoq qarngani nuammik misissugassamik tigusipput. Taamaalilluni nukappiaraq arnamik ilumut toqutsisuunersoq qulakkeerneqarsinnaalissaaq. Aalborgimi karnevaleriaqatini sooq qimassimanerai, angerlarsimaffimminullu angerlarmat kamippaasa aattaqarnerujussuat sooq malugineqarsimannginnersoq, politiit oqaaseqarfigigorusunngilaat.

Nukappiaqqap kamippamminik tumiliorneri Gerda Møllerip Aalborgimi najugaqarfiani ersarissumik takuneqarsinnaammata nukappiaraq nassaarineqarsinnaasimavoq, uteriillunilu misissuinikkut politiit paasivaat kamippaat nukappiaqqap atugaasut ittut 1000-it Danmarkimi tunineqarsimasut. Nukapiaqqap kamippani pisiniarfimmi Bilkami pisiareriarlugit Dankortimik akiliisimavoq. Nukappiaraq Kalaallit Nunaannut utertinnani Danmarkimi angerlarsimaffimmiissimavoq.