15-iinnarnik ukiulik ulapisitsileraluarpoq
Nukappiaq 15-inik ukiulik Maniitsumi ippassaq qassiiliortitsileraluarpoq.
15-inik ukiulik kioskit ilaanni, inuusuttoqannilu imigassanik tillinniarsimasut sapaammi ullaassakkut nalunaaqutaq tallimanngoriartortoq nalunaarutigineqarpoq.
Inuusuttut sisamaallutik tillitat imersimavaat.
Nalunaaqutaq qulingiluanut qiteqquttoq ilaqutaasut politiinut sianerput nukappiaq angerlarsimaffimminni sequtserilersoq imminornissamillu siorasaarilersoq kalerriutigalugu.
15-inik ukiulik kamaqisoq pinaasersimavoq. Isertitsisarfimmi silattorsinneqartussaammat napparsimmavimmut misissortikkiartorneqaqqaarpoq, tassanili pinaaseqqilersimavoq, politeeq, ikiortaa peqqissaasorlu, tamaasa siorasaarsimallugit.
Iluatsippaalli. Nukappiaq ippassaq unnukkut silattoriarmat angerlarteqqinneqarpoq. Inunnik Isumaginnittoqarfik akuliutitinneqarpoq, tassami 15-inik ukiullip imigassanik aalakoornartortalinnik arlalinnik tillinniarsimasutut aamma atorfilinnik siorasaarisimasutut kingusinnerusukkut unnerluutigineqarnissani naatsorsuutigissavaa.