14 millioni koruunit suli qassiiliortitsipput
Royal Greenlandimi siulittaasup tullersortaata Sven Lysep ippassaq oqaasii imatut paasineqarsinaapput, tamanna taamani Namminersornerullutik Oqartussat, Naalakkersuisuni siulittaasoq Hans Enoksen siuttoralugu tatisimanninnerisigut soraarnersiuteqartitsinissaq anguneqarsimasoq.
Siulersuisulli siulittaasuat ippassaq oqaaseqarusunngitsoq ullumi oqarpoq sukkulluunniit sukumiisumik Naalakkersuisut eqqartueqatigineqarnikuunngitsut.
Siulersuisuni siulittaasoq KNR-imut mailimini taamatut allappoq.
Siulittaasulli aamma tullersortini Sven Lyse isumaqatiginerarpaa.
Taamani Royal Greenlandimi siulersuisut atorfinitsitsiniarnermut paasissutissat pillugit Nammiersornerullutik Oqartussat paasissutissittarpai. Suliffeqarfiup aalajaatsumik ingerlalernissaa illuatungeriit kissaatigimmassuk periutsit isumaqatigiissutigineqarput. Atorfinitsisinermili piumasaqaataasut naapertorlugit 14 miliuuni koruuninik soraarnersiuteqarnissaq eqqaaneqarnikuunngitsoq Hans Enoksenip oqaatigimmagu siulittaasup isumaqatigaa.
Siulersuisuni siulittaasup aamma erseqqissaatigaa pisortaasimasut 2001-imi 2006-imilu soraarnersiaat 14 miliuuni koruuninit, Paaviaaraq Heilmannip Flemming Knudsenillu apriilimi soraarnersiassaannit amerlanerusut.
Taamaammat Siulittaasup Peter Grønvold Samuelsenip maannakkut pisortaasut apriilimi tunuarunik aningaasarsiassaat usissuumissutaasariaqarsoringilai, imatut allalluni:
"Qaqutigoortuunngilaq, inuit suliassaqarfinni immikkuullarissuni atorfillit, soorlu matumani pineqartut eqqarsaatigalugit, suliffeqarferujussuarmi Nunarput eqqarsaatigalugu nalinginnaanngitsumi nunanilu assigiinngitsorpassuarni immikkoortoqarfiusumi pisortatut atorfeqartut qaqutigoortumillu annertussusilimmik piumasaqarfigineqartut, nalingiinnaasuunngitsunik akissaasersugaasarnerat."
Siulersuisut atorfinitsitsinerminni nalummassuk ukiup tulliani aningaasaqarniarnikkut ajornartorsiornermit eqqornerlunneqartussaaneq nalummassuk, naapertuilluarlutik iliuuseqarsimanerannik Sven Lysep oqarnera Peter Grønvold Samuelsenip isumaqatigaa.