14-inik ukiulik Lars Samo Qalasersuarmi
Lars Samo Tobiassen, Matumi nukappiaqqat najugaqarfianni najugaqartoq arpattunit 40-sunit 10-ulluni apuuppoq.
Lars Samo Tobiassen, Qalasersuarmi maratonimik naammassinnissimasuni nukarlersaavoq.
Taanna Qalasersuarmeereerluni Nuummut ippassaq tikimmat Radioaviisimit alakkarparput.
- Nuannerpoq artornarlunilu, Lars Samo Tobiassen taama oqarpoq.
Suliniummi Matumi sulisut Akannguaq Lennertip aamma Thorlak Skifte Nielsenip Lars Samo Tobiassen Qalasersuarmut angalaqatigaat arpaqatigalugulu.
- Nukappiaraaterput Lars Samo Tobiassen, unammisuni 40-ni 10-tut inissippoq. Arpaffipput 4,2 kilometerisut takissuseqarpoq, quleriarlugu kaajallapparput. Angusaa kusanartorujussuuvoq tulluusimaarnaqaaq, Thorlak Skifte Nielsen taama oqarpoq.
Qalasersuarmi arpanneq apriilip arfernani pivoq, arpattullu unnukkut qulinut 28 gradit missaani issittoq aallarput.
- Arpaffipput ajunngilaq, aputaa manngerpoq aqilisarlunil, Thorlak Skifte Nielsen oqarpoq.
Lars Samo Tobiassen Qalasersuarmi 28 gradinik issitsigisumi apummilu taama allanngorartigisumi inersimasunut unammilluni 42,195 kilometerisut arpannissaminut piareersarluarsimavoq.
- Ullut tamaasa arpattarpunga, sisoraatinillu arpattarlunga, Lars Samo Tobiassen oqarpoq.
Lars Samo Tobiassenip maratonimi arpannermini akunnerit arfinillit minutsillu 20-t atorpai. Apuuttumit siullermit akunnernik marloqqissaanik kingulliulluni.
Qalasersuarmi arpattussat Svalbartimi Spitsbergenimut apriilip pingajuani tikipput, aqaguanilu arpaffiusussamut Nunarsuut avannarpaanut ingerlaqqillutik.