"134" iluaqutaaqaaq
Kinaassutsimik oqaatiginninngikkaluarluni saaffiginniffimmut Meeqqat Inuusuttullu Oqarasuaataannut 134-mut meeqqat inuusuttullu saaffiginnikkaangata qinngasaarneqartarneq nakuuserfigineqartarnerlu pissutaanerpaasarpoq.
Paarisap ukiumoortumik nalunaarusiaani tamanna takuneqarsinnaavoq. 2006-imi oqaloqatiginninnerit siunnersuinertallit ukioq 2005-imut naleqqiullugu 58 procentimik amerleriarput, ajornartorsiutigineqarnerpaallu tassaasimapput qinngasaarneqartarneq nakuuserfigineqartarnerlu.
Saaffiginninnerit tamakkerlugit naatsorsoraanni marloriaatinngungajalluinnarsimapput, tassanilu ilaapput saaffiginnittarfiup 134-p sumut atorneqarsinnaaneranik paasiniaanerit, aammali ilaavoq oqarasuaammik asuli pinnguartunit sianerfigitissimasut saaffiginnissimanerat.
Meeqqat Inuusuttullu Oqarasuaataannut inersimasut aamma saaffiginnittarput, kisianni tassa saaffiginnittartut 74 procentii meeraapput inuusuttuaraallutillu 18-it inorlugit ukiullit.
Inersimasut 134-mut saaffiginnikkaangata saaffiginnissutaat aanngajaarniutinik atornerluinermut imminulluunniit toqunniarnermut tunngasuunerusarput.
Meeqqat Inuusuttullu Oqarasuaataat ukiuni arfinilinni maanna atoreersimalerpoq. Sapaatip akunera naallugu ullut tamaasa nalunaaqutaq unnukkut arfineq-marluk qulingiluallu akornanni ammasarpoq inersimasunillu ilisimasalinnit akineqartarluni.
