VIDEO 13-inik ukiullit pujortassaarnissamut pikkorissartinneqartut

John Petersen Salik Isaksenilu 13-inik ukioqarput pujortassaarniarsaralutillu.

- Akuerineqarama ullomut 30-t tungaanut pujortartarpakka, Garantinilli pujortalerama pujortarpiarunnaarpunga - maanna ullormut pingasut pujortartarpakka, John Petersen oqarpoq.

- Massakku pujortarpallaanngilanga, immaqa ataaseq affarlu, Salik Isaksen, siornatigut ullormut sikaratsinik qulinik pujortartaraluartoq taama oqarpoq.

Inuusuttuaqqat ikinngutitik pujortartarmata pujortartalersimapput.

- Pujortarneq misilikkakku pujortaannalerpunga, John Petersen oqaluttuarpoq, Salik Isaksenillu pujortartalerneranut patsisaasoq aamma taannaavoq.

- Ikinngutikka pujortartarmata. Assut pujortartarmik.

Peqataajunnaartut amerlapput

Lars Knudsenip atuarfimmi pitsaaliuinermik siunnersortitut maluginiarsimavaa, meeqqat atuarfiup silataani pujortaattartut. Aamma inersimasut pujortarunnaarniartarnerisulli meeqqat pujortarunnaarniarnissaat ajornartigisoq aamma oqaatigaa.

- Qulingiluaasussaagaluarput. Maanna sisamaannaapput, ullumikkullu marluinnaat takkupput, nassuiaavoq.

Suli amerlanerusut pujortarunnaarnissamut pikkorissarnissamut peqataanissaat Lars Knudsenip neriuutigaa.

Nikotinip uerinartupilussuusup toqunartortaqartullu saniatigut, pujortarnermi akuutissat assigiinngitsut 4000-it najuussorneqartarput, taakkulu ilagaat karbonmonoxid – kultiltellu timip celliisa iltimik pilersornerat annikillisittarpaa orsuutillu assigiinngitsut aamma akuutissanik kræfteqalissutaasinnaasunik toqunartortalinnillu akoqarlutik.

Pujortartarunnaarnissaq pillugu atuagassat ukunani peqqik.gl, exale.dk aamma cancer.dk pissarsiarineqarsinnaapput.