12,5 milliardit koruunit soqutigerpianngilai

12,4 milliardit koruunit, tassa taama aningaasaliiniarlutik aatsitassarsioqatigiit Greenland Mineral and Energy nalunaaruteqarput. Aningaasat ilaatigut aqqusinniornermut talittarfiliornermullu atorneqassapput. Aatsitassarsioqatigiit kissaatigaat aatsitassat uranitallit piiarneqarsinnaanissaat naalakkersuisut akuersaassagaat.

Aningaasarpassuarnilli taasineq naalakkersuisut tupaallaatiginngilaat. Iliuuseqarnissarmi sioqqullugu isumagisassarpassuaqarpoq.

- Innuttaasut inatsisartullu akuliunneqartariaqarput, neriorsuutigineqartariaqarporlu innuttaasunik avatangiisinillu eriaginninnissaq, Ove Karl Berthelsen oqarpoq.

Inuutissarsiornermut naalakkersuisoq aamma aperaarput aningaasat 12,5 milliardi koruunit iluatigineraat.

- Soorunalimi qanoq pissarsiarinissai apeqqutaallutik aningaasat tamarmik tikilluaqqusaapput, oqarpoq imalu nangilluni:

- 12,5 mialliardi koruunit iluatiginerigut iluatiginnginnerigulluunniit oqaatigisinnaanngilara. Soorunalimi suliaq inuiaqatigiit ilagalugit ingerlanneqassaaq taamatullu inuiaqatigiit isumaat qanoq ittuunersoq takoriarlugu naalakkersuinikkut isummernissamut aallaaviussaaq.

Inuutissarsiornermut naalakkersuisoq oqarpoq, siorna inatsisartuni isumaqatigiissutit naapertorlugit, inatsisartuni ukiaru aalajangivittoqartinnagu, innuttaasut oqallitsinneqaqqaartussaasut.

Erseqqissaatigaalu qinngornerit ulorianartut sunniinnginnissaat aamma avatangiisinik eriginninniarluni iliuusissat qulakkeerneqartussaassasut.

IA-kkut tunniutiinnartinnagit aamma aatsitassarsiornermi periutsit pitsaanerusut ilisimatusarneq aqqutigalugu pigineqalertariaqarsorai.

Kuannersuarni aatsitassanik piiaanissaq Inatsisartuni amerlanerussuteqartut akuersaassappassuk IA-kkut tunniutiinnassanerlutik?

- Soorunalimi takussavarput inatsisartuni qanoq isummertoqarumaarnersoq aamma IA-p iluani paasissutissat ersarinnerusut aammalu nutaanik aatsitassarsiornermi ingerlatseriaatsimut attuumassuteqartunik nutaaliortoqarsimaneranik saqqummertoqarnera nalilersoqqissaartussaassavarput. IA-p politikkimigut nalilersuinera nutaaq taava piumaarpoq, nassuiaavoq.

Ove Karl Berthelsenip erseqqissaatigaa ukiunut tulliuttunut 100-nut isigaluni naliliisoqartariaqartoq.

Narsami piaanissamut akerliusut siulittaasuat Kalistat Lund oqarpoq, koruunit milliardit qanorluunniit amerlatigigaluarpata akuersaarnaviarnatik.