Polar Seafoodimi saarulliit januarip aallartinnerani kilomut 12,25 koruuneqarput, ullumikkullu 7 koruuneqarlutik.Assi: KNR

12 kronimit 7 kronimut: Saarulliit akikinnerulerput

Aalisakkat akii coronavirusip nunarsuarmi ajornartorsiortitsinerani appartikkiartuuarneqarnikuupput. Aalisartut pisortanit taperneqartalernissaat, aalisartup Malârak Nielsenip ujartorpaa.

Malârak Nielsen Nuummi aalisartuuvoq coronavirusillu nunarsuarmi ajornartorsiortitsinera malugingaatsiarpaa. Aalisariummini Paarnami inuttani ikilisittariaqarsimavai.

- Kinguneqangaatsiarpoq, inuttagut ikilisinnikuupput, Malârak Nielsen oqarpoq.

Tassami aalisariummi inuttat arfiniliusaraluartut ullumikkut sisamaannaapput.

Nuummi saarulliit, saattussat qaleralillu akii Polar Seafoodimi Royal Greenlandimilu qaammatini kingullerni appartikkiartuaarneqarput.

Assagiarsunniassaarpoq

Assersuutigalugu Polar Seafoodimi saarulliit januarip aallartinnerani kilomut 12,25 koruuneqarput, ullumikkullu 7 koruuneqarlutik.

Assagiarsuillu aamma akikillivallaarmata Malârak Nielsen assagiarsunniassaarpoq:

- Naggataatigut 30 kronimiileraluarput maannakkut 20 kroonimiileqqipput. Taava assagiarsunniarneq unitsikkallarnikuuara - saarullinnialerlutalu, Malârak Nielsen oqarpoq.

AAMMA ATUARUK KNAPK: Aalisartut coronap ajornartorsiortitsinerata nalaani aningaasatigut ikiorneqartariaqarput

Nuummilu tunisineq killilersorneqarmat akillu appartinneqarmata aalisartunut eqquingaatsiassasoq, Nuummi Aalisartut Piniartullu Peqatigiiffiata NAPP-p siulittaasuata nassuiaatigaa.

-Tassa imaappoq sapaatip akunneranut ataasiaannarlutik tunisisarput, taavalu karsit amerlassusaat 150-iinnarnut killeqarlutik. Akillu aamma apparniarlugit, NAPP-imi siulittaasoq Vilhelm Egede oqarpoq.

Neqitamit nuannarineqanngilaq

Nuummilu akinik appaaneq peqatigiiffimmit Neqitamiit aamma nuannarineqanngilluinnarpoq:

- Una appaaginnarneq iliuuseqartoqarnanilu, taanna uatsinnut mamaappoq nuanninngilaq, Neqitami siulittaasoq Bendt Jerimiassen oqarpoq.

 

Fiskepriser rasler ned

 

Takornarialerisut coronavirusi pissutaalluni pisortat ikiorsiissutaanik qinnuteqarsinnaapput. Aalisartut aamma tapersersorneqarnissaat piffissanngortoq, Malârak Nielsen oqarpoq.

- Takornariaqarnermut tunngatillugu tapiissutit tamakkua atuupput. Uagut aamma taamatut pineqarnissarput soorlu pisariaqaleraluartoq, maannakkut.

AAMMA ATUARUK Coronap ajornartorsiortitsinera aalisakkat akiinut pingaarutilinnut appartitsisinnaasoq

Aalisartut umiarsualivimmut SIKUKI Harbourimut atuinerminnut akiliuteqarnermik saniatigut, aalisakkanik tunisileraangamik aamma akiliuteqartarput.

- Oqarluaannaraani marloriaamik akiliisarpugut. Tulannganitsinnut akiliisarpugut niusinitsinnilu akiliisarluta, NAPP-imi siulittaasoq Vilhelm Egede oqarpoq.

Aalisakkallu akikillinerani amerlanernik aalisartoqarsinnaasanngimmat arlaatigut aaqqiisoqartariaqartoq Malârak Nielsen isumaqarpoq.

- Taava aningaasarsiornerput pitsaanerujussuarmik ingerlassagaluarpoq umiarsuarnik puttasunik qangatulli tunitsiveqartuuppat.

Isummersuutit