Normunik paasiniaavimmut 118-mut sianerneq 1996-miilli 3 koruunimik akeqartoq maanna 5 koruunimut qaffattussanngorpoq.
Isertitat aningaasartuutillu oqimaaqatigiinnerulernissaat siunertaralugu TELE Greenland A/S-ip kiffartuussivimmut sianerneq akitsulerpaa. Sianerneq ataaseq 3 koruunimik akeqarsimagaluartoq maanna 5 koruunimut qaffatsinneqarpoq. Aamma SMS 1920 TBOG-ikkut normunik paasiniaanerup akia naleqqussarneqassaaq, SMS ataaseq tassunga normunik paasiniaanermi 5 koruunimik aamma akeqalissalluni.
Sianernerup sivisussusaa apeqqutaatinneqarani 118-imut sianernermi aki aalajangersimasuuvoq, atuisorlu normunik adressenilluunniit pingasunik sianernermi ataatsimi paasiniaasinnaalluni. Telefoninit nalinginnaasuniit, ISDN-iniit, GSM-iniit imaluunniit TUSASS-iniit sianernermi aki assigiippoq.
Normunik paasiniaavik Qasigiannguani inissisimavoq ulloq unnuarlu sianerfigineqarsinnaalluni, aqqaneq marlunnillu paarlakaattunik sulisoqarluni.
Akinik allannguutit oktober-ip aallaqqaataani ukioq manna atutilissapput.