11,7 millioni koruunit suli aaneqanngillat

Eqquisup nammineerluni immersortagaq kisitsisinik immersorpaa, pisiniarfimmullu Nathaliamut Nuussuarmiittumut tunniullugu. Nammineerlutik immersukkaminnik Butik Nathaliamut tunniussisartut aalajangersimasut sisamat tallimalluunniit arlaat eqquisimassaaq, arfininngorpallu eqquisimanerluni misissuutigalugu lottonik nutaanik pisileruni paasissajunnarsivaa, 11,7 millioni koruuninik eqquisimalluni.

Butik Nathaliami pisiniartartut apersortuarput eqquisoq takkusimanersoq, eqqukkanilu aallugit, pisiniarsitsisoq Axel Hansen oqarpoq.

Danmarkimi eqquiniaasitsisarfimmi Danske Spil-imi tusagassiisartoq Karen Minke radioaviisimut oqarpoq, 11,7 millioni koruuninik eqquisoq suli saaffiginnissimanngitsoq. Eqquisut periarfissaqarput, lottonik pisiffigisaminnut eqqukkatik aasinnaallugit imaluunniit aningaaserivimmut saaffiginnillutik eqquisimanertik uppernarsarsinnaagaat, tassalu koruuninik 11,7 millioninik eqquisimasup immaqa suli sianiginngilaa pisoorsuulluni.