115 millionit koruunit nassaariniarneqassapput

Aningaasaqarnermut naalakkersuisup Palle Christiansenip, Siumup siulittaasuata Aleqa Hammondip apeqquteqaataanut akissuteqaammini, ukiut tulliuttut pingasut sisamalluunniit ingerlanerini 600 imaluunniit 800 millionit koruunit akornanni Nunarput nunanit allanit atorniartariaqassasoq naatsorsuutigaa.

Palle Christiansenip erseqqissarpaa, Nunatta karsia tamatigut tigoriaannarnik ikinnerpaamik 600 millionit koruuninik imaqartussaammat. Taassumali ilanngullugu oqaatigaa, atorniagassatut pisariaqartinneqartut qasserpiaanerat siumut oqaatigiuminaammat.

Tamatumanimi apeqqutaammata nunani tamalaani akit allanngorarnerat, Inatsisartuni aalajangiunneqartut kiisalu minnerunngitsumik aningaasanut inatsit naatsorsuutinut piviusunut naapertuuttussaavoq.

Atorniakkallu ilaat erngup nukinganik nukissiuutinik amerlanerusunik sanaartornernut atorneqassapput. Taakkununnga atugassanik Nordisk Investeringsbankimit atorniartoqarsinnaanissaa Palle Christiansenip naatsorsuutigaa, aningaaserivimmi taanna Nunani Avannarlerni naalakkersuisunik tunuliaqutaqartoq, inuiaqatigiit ataqatigiissinneqarnerinut avatangiisinullu tunngasunut atukkiisinnaasarmat.

Nunatta karsiata atorniarnissamut pisariaqartitsinera ilaatigut patsiseqarpoq, Royal Greenlandimut milliardit koruunit affaannik siorna tapiisoqartariaqalernera.

Tapiissutinit taakkunannga 225 millionit koruunit missaat atukkiunneqarput, taakkualu utertillugit taarserneqartussaapput. Aamma taamaaqataanik Qaasuitsup Kommunia 70 millionit koruuninik atukkerneqarpoq.

Atukkiinernit taakkunannga naafferartumik utertinneqartut ukiuni tulliuttuni atukkanik taarsersuinermut atorneqassapput.

Palle Christiansenip oqaatigaa, Nunatta karsia 1,1 milliardit koruuninik uninngasuuteqartoq.