113 sianerfigineqarsinnaanngilaq

Nuummi ulluni makkunani ikuallattoqaraluarpat, ikuallattoqartillugu sianerfissaq 113 atorsinnaanngilaq.

Naak ikuallanngikkaluarluta Radioavisimiit 113-imut sianerpugut, minutsilli aappaata qeqqata missaani sianerpoq tiguneqanngilarli.

Duut duut duut duut………

Tusaasassinniit suli sivisunerusumik sianeraluarpoq tiguneqanngittuaannarporli, Nuummiillutami ikuallakkaluarutta qanoq iliussaagut? Tamanna tallimanngormalli qatserisarfiup paasereersimagaluarpaa.

Nuummi qatserisartut ittuat Knud Petersen aperaarput normu 113-imut sianerfissaq sooq tiguneqarneq ajornersoq.

- Tallimanngormat firmat arlaata sianerluni apeqqutigimmagu 113 sooq akineq ajornersoq aatsaat paasivara tamatuma ajoquteqarnera. Paasiniariarakku paasivarput tele-minngaanniit attavia ajoquteqarsimasoq, Knud Petersen oqarpoq.

Taanna aperaarput sooq tamanna pillugu avammut kalerriussisimannginnersut.

- Soorlu aatsaannguaq oqareersunga, aatsaat tallimanngormat paasigakku, tamanna tele-mut nalunaarutigaara, akivoq.

Knud Petersen aamma erseqqissaavoq ikuallattoqassagaluarpat 113-p iluarsineqarnissaata tungaanut. inuit politeeqarfimmut sianertariaqartut tassalu 32 14 48-mut.

Taanna aperaarput qaqugu 113 atuleqqissanersoq.

- Neriuppunga sukkanerpaaq atorlugu iluarsissagaat, ulloq manna tikillugu suli tele-minngaanniit nalunaarfigineqanngilagut, Knud Petersen oqarpoq.