10.000-it akerliussutsimik takutitsipput

Muuamaamik titartakkat akerleralugit akerliussutsimik takutitsinerit annersaat ullumikkut Tuluit Nunaanni ingerlanneqarpoq. Akerliussutsimik takutitsisut 10.000-it Londonimi ingerlaaqatigiipput.

Akerliussutsimik takutitsisut allagartarsualisaarput, ilaatigullu imaattunik allagartarsuarni allaqqasoqarpoq:

”Qunusaaraluni saassussisarnermut sorsunneq, tassaavoq Islamimut sorsunneq” aammalu ”Europa nunanut allanut ataqqinnissinnaassuseqanngilaq.”

Aamma ullumikkut København-imi Nørrebro-miit aallartittumik, muuamaamik titartakkat akerleralugit eqqissisimasumik akerliussutsimik takutitsinertalimmik ingerlaaqatigiittoqarpoq, tassani inuit 3000-it ilaatigut muuamaakkormiunit aamma allanik upperisallit ingerlaaqatigiinnermi peqataapput.

Ingerlaaqatigiinnermi aaqqissuisuuvoq Tanwir Ahmad, Danmarkimi muuamaakkormiut inuusuttut ilinniarluarsimasut oqaaseqartartuat.

- Nørrebrogade aqqutigalugu isumaqatigiissinnaaneq ujartorparput, akerliussutsimik takutitsisut oqariartuutaasa ilagaat.

Muuamaamik titartakkat pillugit akerliusut 1000-it tallimanngornat Libyami Italiamiut konsulatianik saassussiniarsaripput, maannamullu Libyami

akerliusarnerni inuit 11-it toqoreersut, Libyami siuttuusoq Muammar Gaddafi-p ernera Seif al-Islam oqarpoq.

- Akerliussutsimik takutitsineq eqqunngitsuliorneruvoq, kisiannili aamma akerliusunut peersitsiniarnermi politiit akuliussimanerat eqqunngitsuliorneruvoq, Seif al-Islam oqarpoq.

Italiamiut konsulatiata Libyami saassunneqarnera pissuteqarpoq, Italiamiut ministeriisa ilaata Roberto Calderoli-p sapaatip-akunnerani uani, muuamaamik titartakkat ilaannik ilusilersimasumik tujuuluaralersimammat. Maannali Calderoli ministeriunerminit imminut tunuartittoq, premierministeri Silvio Berlusconi oqarpoq.

Libyami illoqarfimmi Benghazi-mi politiit pisortaat aammalu isumannaallisaanissamut ministeri soraarsitaasimasut, Libyami pisortat nalunaarput.