10.000 dollarsiuteqarluni tigusaavoq
Canadami politiit, Nunavummi immikkoortaasa Iqaluit mittarfianni angut taskimini 10.000 dollarsiutilik tigusaraat. Tamannalu pivoq juullip aappaani.
Allattoq Mads Lynge
Tusagassiorfinnut nalunaarut ippassaq saqqummiunneqartoq naapertorlugu Canadami politiit ikiaroornartunik tuniniaanermi paasiniaasartuisa, eqqartuussivimmit paasiniaanissamut akuersissut tunngavigalugu Duarte Gabriel Decoutup pisatai misissorsimavaat, misissuinerminnilu canadamiut dollarsii 10.000-it taskiani nassaaralugit.
Decoutu unnerluutigineqassaaq pinerlunneq aqqutigalugu pigisaqalersutut, taamaattumillu Iqalunni eqqartuussivimmut februaarip sisamaani sassartinneqassalluni.