10 millionit koruunit suliffissaaleqisunut atorneqartussanngorput
Ukioq manna qaammatini siullerni pingasuni suliffissaaleqisut 3000-inik amerlassuseqarput, tassa siorna ukiup taamaasineranut naleqqiullugu 200-nik amerlanerullutik.
Taamaattumik suliffissaaleqisut amerliartuinnarnerat Naalakkersuisut iliuuseqarfiginialerpaat. Tamannalu anguniarlugu aningaasat katillugit 10,6 millionit koruunit suliffissaaleqisunut immikkut ittumik iliuuseqarnissamut atugassanngorlugit Naalakkersuisut maanna immikkoortippaat.
Taamatut iliorneq Siumut sinnerlugu aningaasaqarnermi ataatsimiititaliami ilaasortanit tapersersorneqanngilaq.
Suliffissaaleqisunut immikkut ittumik iliuuseqarnerup atorfinnik qassinik pilersitsinissaa ersersinneqanngitsoq Aleqa Hammond, Per Berthelsenimut ataatsimiititaliami sinniisuusoq, isumaqarpoq.
- Naalakkersuisut qinnuteqataannit takusinnaasat naapertorlugit aningaasat pikkorissartitsinernut annertunerusumik atorneqarniarpasipput, tamannami namminermi ajunngilluinnarsinnaavoq, suliffinnullu ataavartunut taartaasinnaanani, Aleqa Hammond oqarpoq.
Iliuusissaq nunatsinni nunaqarfinnut isorliunerusunullu suliffissaaleqinermik annertuumik eqqugaasunut sunniuteqassanersoq Aleqa Hammondip aamma apeqquserpaa.
Taamatuttaaq suliffissaaleqinermik akiuiniarneq pillugu ataatsimoortumik pilersaarummik Naalakkersuisut saqqummiusseqqaartariaqartut Aleqa Hammond isumaqarpoq.
- Ataatsimoortumik pilersaarummik Naalakkersuisut suliaqanngippata iliuuserinialersaagaq aaqqiigallarnerinnaaratarsinnaavoq, Aleqa Hammond oqarpoq.
Suliffissaaleqisunut immikkut ittumik iliuusissaq nalinginnaasumik aamma aatsitassarsiornermut tunngatillugu suliffissaqartitsiniutinik aallartitsinissamut atorneqassaaq.
