10 milliardi koruuninik taarsiiffigitissinnaapput
Nunavumiut inuusuttaasa kostskolertinneqartarsimanerminni kulturikkut oqaatsitigullu annaasaqaatigisimasatik pissutigalugit taarsiiffigitissinnaalissapput.
Tamanna pillugu tusarniaanerit ippassaq aallartipput, Nunavumi eqqartuussiveqarfiit tusarniaatitsisuullutik.
Tusarniaanerit Canada-mi nunap immikkoortuini qulingiluani ingerlanneqarput, kostskolertitsisarsimanerit kingunerlutsitsisarsimanersut paasiniarneqarluni.
Aningaasat taarsiissutissatut immikkoortinneqarsimasut 10 milliardi koruunit missaanniipput, siunnersuullu malillugu atuartoq ataaseq ukiumi siullermi atuarfiusumi 50.000 koruunit missaani taarsiiffigitissinnaassaaq, ukiunilu atuarfiusimasuni tulliuttuni 15.000 koruunit missaani pissarsiarisinnaassallugit.
Eqqartuussisuserisoq Steve Cooper atuartuusimasut 800-nit amerlanerusut sullippai, taannalu oqarpoq sivikinnerpaamik qaammat ataaseq qaangiuppat taarsiiffigitissinnaanissamik tusagaqartoqarsinnaassasoq.
Kinguaassiutitigut allatulluunniit atornerlunneqarsimasut immikkut eqqartuussisulersuussisinnaassapput, annerpaamillu 2,5 millioni koruuninik taarsiiffigitissinnaassallutik.
