10 kronet nutaat

Allattoq Najaaraq Egede
apriilip 24-at 2006 08:21

Aningaasaq 10 krone H.C. Andersenip oqaluttualiaa aallaavigalugu saqqalerneqarsimasoq, aatsitassanik assigiinngitsunik pingasunit kuisaasoq, Naalagaaffiup Aningaaserivissuata kaaviiaartilerpaa.

10 krone nalinginnaasumik kanngussaassaaq, tamatuma saniatigut kuultiusoq sølviusorlu aamma pissarsiarineqarsinnaalissapput.

Dronninngip assinga 10 kronet pingasut assigiinngitsut saqqaanniissaaq, illuatungaaniissallunilu oqaluttualiortorsuup H.C Andersen-ip oqaluttualiaa ”Tarraq” aallaavigalugu eqqumiitsuliortup Bjørn Nørgaardip kigartugaa.

10 kronet assigiinngitsunut pingasunut kuisat amerlaqatigiissanngillat. 10 kronet kuultiusut 5.000-iinnanngorlugit, sølviusut 50.000-inngorlugit kiisalu 10 kronet nalinginnaasut 1,2 millioninngorlugit kaaviiaartinneqassapput.

10 kronet aningaaserivinni aningaasanillu nioqquteqarfinni ullumimiit pisiarineqarsinnaassapput inniminnerneqarlutilluunniit. 10 krone kuultiusoq 2.000 kroneqassaaq, sølviusorlu 200 kroneqassalluni.