15 millioni koruunit. Tassa aningaasanik tamalaanik katersaatillit Issittup Ukiuinut atatillugu aningaasap 10 koruuniusup pisiariniarlugu maannamut atorsimasaat.
Aningaasaq taanna nunatsinni Danmarkimilu ataasinngorpat saqqummersinneqassaaq, Nationalbankilu saqqummersitsisuuvoq.
- Tupinnaqaaq. Siornatigut saqqummersitsisoqaraangat soqutiginnittut taama amerlatigineq ajoraluarput, Nationalbankip pisortaanera Torben Nielsen radioaviisimut oqarpoq.
Aningaasat 10 koruuniusut 6000-inngorlugit sananeqarsimapput, katersisartunillu soqutigineqaqalutik.
10 koruuni kuultimik nunatsinnersumik sanaajusoq ataaseq 2500 koruunilerlugu akiginiarneqarpoq, suliluunniillu saqqummersinneqartigani nungoreerpoq.
- Aningaasaq kuultimik Kalaallit Nunaanneersumik sanaajummat soqutigineqaqisoq ilimagaarput, nannumillu assitaqarmat kusanarluinnarpoq, Nationalbankimi pisortaaneq Torben Nielsen oqarpoq.
10 koruuni ataaseq 8 gramimik kuultitaqarpoq, kuultimillu 8 gramimik piniaraanni savimissaq 500 kiilu Nalunamit piiarneqartariaqassaaq.
Tassa aningaasat 6000-it taakku sananiarlugit saviminissaq 3000 tonsi piiarneqarsimavoq.
Aningaasat tamarmik immikkut normulersugaapput.
10 koruuni nalinginnaasoq, nannumik assitalik, 1,2 millioninngorlugit sanaajuvoq, naalagaaffeqatigiinnerullu iluani ataasinngorpat saqqummersinneqassalluni.
- Aningaasaq taanna katersisartunut aamma nuannarineqassaqisoq ilimagaara, Nationalbankip pisortaanera oqarpoq.
