1-0 tamulugassanut peqqinnartunut
Qalunermut kissaavik qaminneqarsimavoq imerfiusallu naatitanik grønsaginillu immerlugit kioskimi nuisaninngorlugit inissinneqarsimapput Nuummi illorsuarmi timersortarfimmi.
Taamatut suliaqartut tassaapput B-67-meersut, ukiormanna GM-imik aaqqissuisuunertik iluatsillugu aalajangersimasut peqqinnartunik timersortartunut sassaallerniarlutik. Isumassarsiorfigisimagaat www.staevnesnacks.dk, Danmarkimi timersortartut kattuffissuat suleqatigalugu timersortartunut tulluarsakkannik tamulugassioriaatsinik ineriartortitsisimasoq.
- Inuusuttut assorsuaq tamanna nuannaraat. Allaammi inuusuttut arlaat ullaaq pastasalat-eqarnersoq paasiniaavoq, B-67-imeersoq Jytte Lindskov Jakobsen KNRimut taama oqaluttuarpoq.
B-67 GM-mik aaqqissuisutut ilisimatinneqarsimavoq pissartanngorniunnerit nalaanni timersortarfiup cafeteriaa nammineq ingerlatissagaat.
- Taava inuusuttunut takutikkusuummersimavarput timersortarfimmi nerisassanik peqqinnartunik aamma sassaallertoqarsinnaaasoq. Eqqortuusinnaanngilarmi pissartanngorniunnerit nalaanni timersortartut pølsenik pommesfrittesinillu sassaallerfigineqassasut. Taava nassaarilerparput www.staevnesnacks.dk tamatumalu kingorna pisoqalertortpoq, Jytte Lindskov Jakobsen taama oqaluttuarpoq.
Pisiffik grønsaginik naatitanik puussaannillu tunissuteqarsimavoq, Brugsen sandwichinik peqqinnartunik tunissuteqarsimasoq. Royal Greenland pastasalatep raajartassaanik aamma tunissuteqarsimavoq. Ullorlu siulleq tamulugassat peqqinnartut 80-it tunineqarsimapput taakkulu saniatigut pastasalatet 80-it aamma tunineqarsimallutik.
www.staevnesnacks.dk peqqinnartunik tamulugassiornermut najoqqutassianik nassiussisimavoq ilanngullugillu nassiussimavaat naatitanik grønsaginillu qalipaajaatit sakkussallu allat.
Timersoqatigiiffimmeersut namminneq piumassutsiminnik tuniniaasut sassaallertuupput assullu suliaat alutorsaatigineqarsimapput.
GM-rtoqarnerani peqataasut 170-it missaanniipput illoqarfinnit assigiinngitsunit aqqaneq marlunnit aggersut.
