070707 katikkumasut imaaginnavipput
Arfininngornermi juulip ulluisa arfineq-aappaanni, tassa ullumikkumiit qaammat ataaseq qaangiuppat, Danmarkimi oqaluffiit rådhusillu ulapputtussanngorput. Ulloq taanna, tassa 070707, katikkumasut amerlalluinnarsimapput.
Immaqa uinngortussap siunissami katiffissiortarnissaq eqqaamalluarsinnaaneruniassagamiuk? Ullorli taanna katikkumasut amerlalluinnarput.
Danmarkimi Haderslevip Rådhusiani katikkumasut imaaginnavissimapput. Ullormut marluinnaat katitinneqartaraluartut, ulloq taanna katikkumallutik ilungersorsimasut amerlasimaqaat, ullorli 070707 ullaakkut nalunaaqutaq 07:07 katikkumasut itigartinneqarsimapput.
Nittartagaq bryllup.dk naapertorlugu ukioq manna katikkumasut tallimaagaangamik, ataatsit ulloq 070707 katittussaasimapput.
Aamma Nunatsinni ulloq taannarpiaq katikkumasut amerlasut, Nuummi palaseqarfimmi allaffik nalunaarpoq, qasserpiaalli ulloq taanna katissanersut oqaatigisinnaannginnerarpaat, allaffik matoqqammat.
Ukioq kingulleq ulloq 060606 eqqorlugu katikkumasut ikittuinnaasimapput, immaqami ulloq taamaattoq katiffigissallugu aappariiulluni ernumanarsinnaassammat.
