ASSIT Paamiuni salaatit nutaat
Salaatit Arctic Greensimeersut akoorutissaligaanngitsuupput, salaatinillu assigiinngitsunik marlunnik naatitsisarlutik.
- Sapaatit akunneri tamaasa salaatit 200-t katersorsinnaasarpagut. Paamiuni Brugsenip pisisartui salaatinik nutaarluinnarnik pisisinnaapput katersorneqarnerinit minutsialuit qaangiunnerini, Michael Lynge, Heretis Arctic Greensimeersoq taama oqarpoq.
Arctic Greens ukioq kaajallallugu salaatinik pilersuisinnaavoq, salaatillu naatittagaat uumasuaraqaratik. Periaaseq atorneqartartoq taaneqartarpoq hydroponic, tassaalluni salaatit issumik atuinani naatinneqartarlutik. Taamaalilluni naatitat naasupilunnit, uumasuaqqanit nappaatinillu eqqugaasarnatik.
Arctic Greens ullumikkut 300 kvadratmeterinik annertussusilimmik tunisassiorfeqarpoq, siunissamilu pilersaarutigaat Nuummi tunisassiorfimmik pilersitsiniarlutik.
- Neriuppugut suliamut pilersaarut Nuummut aamma siaruartersinnaassallugu. Tunisassiorfimmik Nuummi pilersitsiniarnermik periarfissat maannakkut misissorpagut, aammattaaq cherry tomatinik misiliilluta aallartitsiniarpugut.
Salaatit nutaajunerusinnaanngillat mamarluinnarlutillu. Nunatsinnut tunisassiassatut tulluarluinnarlutik. Taamaalilluta nunanit allanit nioqqutissanik eqqussuineq annikilliliiffigeqataasinnaavarput, suliffeqarfinnillu amerlanerusunik pilersitseqataalluta, Michael Lynge Heretis, Arctic Greensimeersoq taama oqarpoq.
